Fundman睇市：安踏 宜趁弱市收集

結算前夕港股悶到震，睇住A股大升2.4%，恒指就依然拉牛上樹，收市升91點，報23,671點。雖然收市指數係就係創二十個月新高，但整體大市升跌股份比例，卻係49比51，跌的比升的多，仲有唔到十個交易日過年，咁落去，炒家想唔提早收爐都唔得。

美國沽空研究機構Glaucus，出報告狙擊啱啱周末宣布高價易手的中金再生（00773），話公司自稱內地最大廢金屬回收商，純屬子虛烏有，建議沽售，目標價仲絕到畀佢「零雞蛋」，不過中金再生發聲明指有關指稱完全失實。

舊年八月，Glaucus狙擊西部水泥（02233），後者停牌出晒澄清都要隊。留意到，近日中金再生沽空確實有異動，過去六個交易日，五日沽空佔成交比例四成以上，淡友看來是做好部署。

基金逃生沽李寧

朋友問起李寧（02331）單蠱惑供股，係咪真係有基金受章程限制，無得低價加注。史提芬意思並唔係有基金笨到唔供損害投資者，而係部分基金章程列明不可投資或持有非交易證券，呢類基金好有可能選擇在呢隻唔掛牌、無息兼無到期日的零息債券除淨前，沽掉李寧。

今次體操王子財技令人眼界大開，有云一次不忠，百次不用，今次大股東聯袂私募基金搞大龍鳳，講到尾係要玩以小控大、低價增持，有貨股民當然要二仔底死跟到尾，但無貨的真係睇見怕怕，要揀純種國產體育品牌，安踏（02020）變成不二之選。

安踏股價月中見過8.72元後，連日調整，尋日開6.89元後由頭升到尾，收報7.4元升0.51元。從安踏公布數字，今年第二季訂單情況仲未見止跌迹象，較一年前跌15至25%，大致與內地運動行業整體跌幅20%相若。不過，去年市場共識係體育行業一三年上半年業績見底，但看來機會唔大，猶幸是庫存高峰期，較有可能在去年第三季見了最壞時刻。

股價往往比實際營運走得前，去年七月安踏股價在4元水平起步，至今升幅超過八成，公司去年中期手持淨現金逾47億人民幣，相當於每股2.35元或股價的31%，即使業績復甦需時，至少慷慨的派息政策有一定保證（過去四年盈利派息率均在六成以上），現股價相信下調水位唔多，最啱趁弱市收集。