股海實戰：廣汽 跟炒適可而止

港股隨外圍升市挾高百幾點，但見個股炒作氣氛大不如前，大戶喺期指結算前力托指數，讓期指好倉食胡兼喺高位散現貨嘅可能性不小，宜密切留意港匯，以觀察是否有熱錢流出。

○七年魚缸興起Accumulator，起初唔少投資者以為好筍，點知一場金融海嘯，才知呢樣嘢真名叫「I kill you later」，唔少富豪明星都輸到叫救命！但橋唔怕舊，最緊要受，依家樓市都出現Accumulator，事緣聽聞唔少炒家集團互相以高位承接舖位，雖然表面上投資回報極不合理，但炒家們樂於咁做，皆因可向銀行取得更大額嘅按揭貸款繼續炒作，之後就以「首兩年保證租金回報四厘」作招徠分拆物業出售，呢招同當年投行將股票炒到天價，再以Accumulator散貨嘅手法同出一轍，結果就係收息唔夠買膠布！所以話，唔係趕住自用，最好別入樓市接火棒！

中金再生是非臨門

尋日晨吉咁早收到美資研究機構Glaucus Research一份有三十多頁質疑中金再生（00773）帳目嘅研究報告，該股上周五晚才公布獲中節能入股，點知突然是非臨門搞到尋日拉閘。翻查沽空資料，發現一月十五日該股沽空比率突然大增至45%，而十八日、廿二至廿五日嘅沽空比率均逾40%。咁難免令人揣測，係咪有人沽空咗隻股票，怕有好消息要高價補倉，所以拿拿臨拋出「一文不值」嘅評論，真假要當事人先知，且看公司方面點樣拆招！

廣汽（02238）發盈警，預計去年度純利按年減少七至八成，前年公司賺42.7億幾人仔，去年首三季賺18.3億人仔，即係話去年末季業績由盈轉虧，主要原因係受中日關係惡化、新建企業尚處起步期以及行業競爭加劇、中心城市限購車輛等因素影響。之不過，尋日其A股不跌反漲停板，H股亦升0.6%收場。

針對H股表現，相信其中一個原因係股價由月內高位7.99元回落至尋日低位6.05元，跌幅足有24%，某程度已預先反映利淡消息，加上技術超賣，造就短線反彈。

但阿莊認為，嚟緊中日關係仍存變數，地緣政治風險對其估值嘅影響仍揮之不去，加上如今內地主要城市飽受空氣污染之苦，限購令之類嘅措施可能會擴大，喺多項不明朗因素之下，博反彈要適可而止，提防一旦完成後抽再次掉頭跌穿6元關，宜待回試5.3至5.5元區域再作考慮。