樓市出更：大款中「招」辣到縮

政府舊年十月底推出雙辣招，其中新推出嘅買家印花稅（BSD）即時嚇窒內地買家，拖累舊年第四季內地個人買家入市比例進一步下跌。地產代理老友同劉Sir講，根據臨時數字睇到，舊年十、十一月平均每月內地個人買家入市比例都可以維持超過一成，但係到十二月時比例就急跌到得番6.7%。

內地個人買家佔本港私人住宅買賣比例，經過舊年第一、二季連跌兩季之後，第三季略見反彈，但第四季遇啱BSD措施，又再掉頭回落。

尚悅抗辣 BSD交投旺

根據中原地產研究部黃良昇所講，新措施生效之後，內地個人買家佔本港私宅買賣比例跌到得6.7%，係二○一○年十月以後嘅新低，不過相信BSD實際影響要今季數字先可以反映出嚟，但比例應該唔會跌到零，因為仍然有唔少內地人喺香港工作或者經商，有需要在港置業自用。

至於舊年第四季，已知內地個人買家比例佔宗數10.7%，按季輕微跌咗0.6個百分點，不過佔成交金額比例就微升0.1個百分點，去到16.5%。期內內地個人買家佔一、二手住宅嘅成交比例同時跌咗，一手住宅跌幅比較明顯，佔成交宗數由舊年第三季嘅23.5%，跌到第四季嘅20.6%，反而二手住宅就只係微跌咗0.3個百分點至8.3%。

雖然內地個人買家入市比例跌咗，但恒地（00012）等旗下嘅元朗尚悅，就似乎無受影響，仍受內地客同外籍客鍾愛，地產代理估計，該盤喺BSD之後至少錄得逾50伙同類成交，相信係全港最多BSD交投嘅新盤，剛有個3座高層C室，建築面積603方呎，由一個持香港身份證、但仲未係永久居民嘅買家用約442.8萬元購入，估計須繳付約66.4萬元稅款。

啃稅買天匯創紀錄

依家港元對人民幣跌到約莫八折，所以部分內地豪客都唔介意啃巨額BSD，好似恒地今個月以約1.3億元賣出嘅西半山天匯中層B室，買家就係內地客，單係BSD稅款就要約1,992.6萬元，創咗「辣招」推出以來稅款紀錄。

唔好以為內地客只係買豪宅，今個月有內地買家以170萬元買咗個屯門居屋兆隆苑低層14室，要畀約25.5萬元BSD，相信係暫時較細碼嘅BSD個案。