牛熊對壘：國指乏力吼21815

大市停止再向頂位推進，恒指昨低開50點後牛皮，全日波幅141點，最高見23,688點，低過前日的23,710點，收市23,598點，跌36點，主板成交788億元，上升動力唔夠，但下跌幅度亦唔大。

新世界（00017）夥同萬科置業海外（01036）投得荃灣西地皮，新世界創新高，唔關事的地產商一樣得益，股價齊齊向上衝，原因是地皮估值超預期，意味大孖沙睇好後市，愈多地揸手的地產商當然愈受惠，地產股Call輪繼續要留意。

整體窩輪市場尚算維持人氣，昨日成交116.66億元，按日升4.4%，牛熊證成交按日升3.2%至63.93億元。

前日恒牛總街貨增加4.7億份至60.14億份，熊證街貨減少1.3億份至33.85億份，兩者差距有所拉闊，牛證重貨區23,000至23,499點，涉及24億份街貨，首道防線距現價約100點，有街貨3.4億份，大家睇住呢個位。

內地有傳即將發出虛擬流動網絡營運商牌照，聯想（00992）勁升6.5%，騰訊（00700）微揚0.7%，中移（00941）、聯通（00762）及中電信（00728）齊齊趴低。

中移或失守85元

中移再試低位，85元未必守得住，相關窩輪昨錄得30.8億元成交額，是連續第六日超過正股，亦多過恒指窩輪成交29.17億元。

幾隻中資重磅股如國壽（02628）、安碩A50（02823）及平保（02318）的相關窩輪昨日成交都明顯增加，增幅分別是24%、50%及33%。睇番市況，細價股繼續飛揚之際，部分板塊出現後勁不繼的情況，就算滙豐公布一月份中國PMI初值為51.9，創二十四個月新高，魚缸反應都係麻麻哋，滬綜指跌18點，恒生國企指數跌70點，跌幅0.5%，差過恒指，睇淡短線後市，可考慮買入國指Put，中企美林Put（21815）今年六月二十七日到期，行使價11,500點，實際槓桿7倍。