股海實戰：中芯密切留意映期

雖然內地經濟數據顯示復甦勢頭確立，但兩地魚缸無動於衷，缸邊友惟有繼續炒股唔炒市。再有久違了嘅股仔名列升幅榜，如華脈（00499）、中民（00681）、PNG（00221）等，加埋每周一個當炒概念，即日鮮選擇係多咗。

呢期當紅嘅「染紅股」中，尋日星獅（00535）最靚仔，股價再升21%，但係隻福田（00420）就先抽高上1.38元再掟到落低位1.13元，收報1.16元，倒跌6%，所以話炒即日鮮真係要藝高人膽大，一有唔對路，走遲半步隨時嘔凸！

深國員工過肥年

前海概念股回吐，深圳國際（00152）跌6%，中集（02039）跌3%。講到深國，翻查資料，公司喺本周二呈交嘅披露報表顯示，喺一月七、八、九、十、廿一及廿二日，因被行使認購權（公司於一○年九月廿八日授出）而發行4,652萬股，行使價為0.58元，其中單係一月廿二日公司董事及僱員各行使認購權而轉換咗572萬股及3,229.75萬股。咁啱公司喺本周二股價大炒，翌日曾高見1.2元，若以此高位計算，呢四千幾萬股最多可獲利2,800多萬元。行使時間「靚到絕」，公司上下揸住呢份「BONUS」真係過肥年！此外，上周五公司通告披露授予1,981萬份認股權，行使價0.91元，有效期至一五年九月，其中1,181萬份授予兩名董事，睇吓他日行使又可唔可以贏個DOUBLE！

中投三寶中，呢排保利協鑫（03800）同旭光（00067）人氣旺盛，前者尋日成交有10.9億元，而旭光亦有4.48億元，股價分別升4%及6%。如今三寶中僅剩中芯（00981）未動身，可密切留意映期！

中芯將於二月六日公布去年度業績，去年第三季度公司虧轉盈，賺1,196.69萬美元，之後大行評語明顯改觀，其中摩通話中芯業務良好勢頭可持續，評級上調至「增持」，目標價0.45元；滙證就話其業務表現可跑贏同業，重申「增持」，目標價0.39元。呢兩份報告發表嗰時中芯股價才三毫零子，依家目標價已實現。至於最新一份報告係本月上旬瑞信發表嘅，評級為「跑贏大市」，目標價0.57元。

二月初業績前，中芯確有條件炒一轉，再睇埋股價走勢，本月中旬以來喺0.47至0.51元經已行咗近兩周，似係醞釀突破，𥄫實交投，目標踢上0.58元，跌穿0.47元止蝕。