樓市出更：輕鐵上蓋 16財團決戰

啱啱開標嘅荃灣西站六區限呎項目由新世界發展（00017）同萬科置業（香港）以遠高於市場預期嘅價攞到，反映業界非常睇好後市，尋日截收發展意向書嘅港鐵（00066）天水圍輕鐵天榮站上蓋項目，就收到16份意向書，數量拍得住西鐵上蓋項目，而個別測量師更即時調高估值11%，去到超過24億元。

荃灣西站六區限呎項目本周三開標，尋日就輪到輕鐵天榮站上蓋項目截收意向書，港鐵發言人話收到16份意向書，比市場預期理想。

長實新地爭 泛海「出山」

劉Sir知道，除咗長實（00001）、新地（00016）、同新世界發展及恒地（00012）等大發展商，仲有中國海外（00688）、永泰地產（00369）同嘉華國際（00173），而幾年無玩過鐵路項目嘅泛海國際（00129），亦都出嚟表示有興趣。近幾次西鐵項目都收到16至18份意向書，交通相對無咁方便嘅輕鐵站上蓋都有咁嘅成績，都幾厲害。

泛海國際執行董事關堡林同劉Sir講，依家市區地皮已經唔多，呢個項目交通方便，所以先有興趣，不過，係咪入標要攞到份招標文件先再講。

輕鐵天榮站上蓋項目講緊可以起成1,600伙，美聯測量師林子彬覺得今次反應熱烈，所以事隔一日就將估值由22.09億大幅加到24.56億元，講緊樓面約98萬方呎，除番開地價由之前2,250元升到2,500元一呎，不過，仍然係估值下限，而上限價約莫每呎3,500元。

高緯環球張翹楚話，今次截意向反應唔錯，但由於位置唔及剛批出嘅西鐵荃灣西站六區，所以最終標書或者唔夠上述西鐵項目錄到8份咁多，樓面呎價料約3,000元。

何文田地王今日招標

另屯門掃管笏第56區限量地今日截標，高力國際（香港）譚智仁話，呢幅地屬中低密度發展，估值約15.2億元，樓面呎價約4,033元。係市場上限價。

至於何文田常樂街與常盛街交界豪宅地及東涌第3A區商業地亦會喺今日招標，三月八日截標，最高估值約148.5億同埋16.2億元。