牛熊對壘：中銀破頂吼22117

恒指高位緩緩上移，昨日觸及23,710點，11隻恒指熊證因此被強制收回，涉及約1.8億份街貨，相當於376張對沖期指。一三年過了三個星期，合計共有242隻恒熊被劏，同期「唔覺意」被收回的恒牛只有61隻，相差之大唔使多講。

不過，恒指今次大部分升幅都在一月二日完成，當日收市價計算，到昨日的十五個交易日高位埋單一睇，只係升咗399點，無波幅難炒輪，難怪部分股友都小注玩埋二三線窩輪，偶有爆發的火花，好似昨日急彈的國美（00493），日前才因結束香港業務被洗倉，就算公司出來澄清話香港業務不在上市公司之內都無用。但一有消息指內地工信部話國美具備營運移動通訊轉售業務的條件，股價即時大反彈，昨日排在窩輪升幅榜首的，就是野村發行的國美Call，彈足183%。

本欄昨日推介的友邦（01299）都唔錯，正股升1.8%，高盛估計友邦去年第四季新業務價值按年增長22%，目標價37.8元。昨日收市價30.55元，仲係抵買。

A股ETF人氣減退

昨日主板成交808億元，窩輪成交按日升4.4%至111.69億元，最活躍窩輪正股資產是恒指，錄得27.5億元成交。A股牛皮，連帶ETF的人氣都減退，相關窩輪成交跌，最旺的是安碩A50（02823）輪，有3.7億元成交額。

深圳前海概念前日勁炒後，昨日仲有餘波，深控（00604）加埋注資因素，彈16%，但市場清醒番啲，深圳科技（00106）大幅回吐、華南城（01668）回軟。

當然，前海發展規模大，若然不是雷聲大雨點小，要落實推進，受惠的股份實在唔少，要數的不應遺漏可做跨境人民幣業務的金融股，尤其是中銀香港（02388），昨破頂升1.9%。中銀瑞信購（22117）今年八月三十日到期，行使價25.9元，實際槓桿7.7倍。