股海實戰：國美有條件炒上

尋日港股先升後跌，全日成交812億元。跌市成交增，股票股價下跌嘅有六成多，似乎部分炒家開始獲利離場，準備歲晚收爐。

指數持續喺高位唔上唔落、跌市成交增，加埋發霉股仔排隊翻炒，都係升浪快將見頂嘅先兆。好似前日隻深圳科技（00106）失驚無神炒高四成、尋日輪到中國七星（00245）、南海控股（00680）、奇峰（01228）、馬斯葛（00136）等股仔名列升幅榜。

受惠行業兼併重組指導意見出爐，尋日中資鋼鐵股逆市做好，馬鋼（00323）、鞍鋼（00347）、重鋼（01053）升幅介乎1至3%，首長國際（00697）升9%，都係價細嘅好炒！此外，每逢大市回吐壓力漸現，兩隻藍籌食品股旺旺（00151）同康師傅（00322）總係逆市有所表現，尋日兩者股價分別升1.3%及0.9%。

雨潤留意翻兜機會

反觀近期雨潤食品（01068）跌幅較大，尋日失守6元關，收報5.97元，跌幅2.7%，會唔會預示有「盈警」之類嘅負面消息，暫時不得而知，但其實睇公司中期純利大跌逾九成，就全年度業績響警鐘又有幾出奇？純睇走勢，是浪調整守穩50日線5.5至5.6元水平，又可以留意翻兜機會。

論異動股，尋日最矚目嘅應該係國美電器（00493）。周初傳來大股東持有嘅香港零售業務將結業，大戶乘機震倉，失魂魚就有理冇理跟沽隻國美，周一低見0.91元後，當日卻反彈至接近全日高位嘅0.96元收市，翌日低位0.93元，尋日再試0.93元承接下，藉內地傳媒報道有關國美同蘇寧均積極爭取成為首批「虛擬運營商」嘅消息炒上，高位見1.03元，收報1.01元，升幅7%，成交達4.54億元。

但老實講，依家攞唔攞到牌都係估估吓，況且聽講最快要年中先至公布發牌結果，而早前傳聞好大機會獲發牌嘅騰訊（00700），尋日亦未見跟炒，照計只係隻國美抖夠氣搵藉口翻炒而已。

事實上，隻股喺低位行咗一浸，已反映利淡因素，基金大戶收咗唔少平貨，嚟緊公司業績有改善空間，股價有條件反覆炒上。本月初股價一口氣踢穿1元關，抽到上1.18元先有回吐，之後回落至接近50日線0.9元現支持，短線企穩1元（剛好喺10日線所在）樓上，可再試月初高位。