樓市出更：樓價興跳級用家追到咳

樓價已經唔再係逐步咁升，而係跳級飆升，屋苑樓價日日升「爆燈」，昨日又有馬鞍山曉峯灣畔，一個高層海景單位建築呎價賣成7,600元，破晒屋苑歷來紀錄；另外，東涌東堤灣畔3座一個高層單位，亦啱啱以建築呎價7,091元賣咗，首過七千創新高。

世紀21奇豐梁榮貴同劉Sir講，曉峯灣畔5座高層B室全海景戶，建築/實用面積609/482方呎，剛以463萬元賣咗，唔止係屋苑兩房單位新高，建築/實用呎價高達7,603/9,606元，仲破屋苑歷史紀錄，呢個單位仲係啱過咗兩年期，唔使畀SSD。

東堤建築呎價破七千

中原又話，東涌東堤灣畔3座高層D室，啱啱賣咗507萬元，建築呎價7,091元，首次過七千；同時，荔枝角美孚新邨仲爆，美聯話，屋苑今個月有約38宗成交，平均建築呎價首過七千元達到7,020元，創歷來新高；其中4期百老滙街101號中層B室都賣成1,245萬元。

另外，市區居屋鑽石山龍蟠苑，上個月兩房單位310萬元都有貨，今個月已經跳到350萬元先有貨，真係講都無人信！富誠地產陳錫金講，龍蟠苑E座低層4室，建築面積521方呎，近日白表賣350萬元，同類低層單位樓價，上個月僅310至320萬元，一個月個價升一成；另外F座低層11室更賣到成360萬元。

豫豐扣稅賺83萬走貨

美聯爆料，上水居屋旭埔苑A座中層5室，本來等多兩個月SSD就鬆綁，業主點知唔等，賣咗320萬元，扣埋5%嘅SSD仲有76萬元賺。祥益講，屯門豫豐花園連平台特色單位，賣328萬元，扣埋5%嘅SSD仍賺逾83萬元。

自地監局推出二手住宅實用面積執業通告後，該局發言人話，今個月一號至二十二號止，巡咗407間地產代理舖，查咗5,365次網上及報章廣告，發現36宗涉及代理舖，同15宗涉及網上及報章廣告嘅違規個案，又分別接到4宗同3宗上述同類嘅投訴，正進行調查。運輸及房屋局局長張炳良都話，新規例生效無耐，都有數十宗違規，都算顯著。