股海實戰：沿海家園搭順風車

恒指繼續矮仔上樓梯，但魚缸炒風半點未減，好似尋日就跑出個「前海」概念，被喻為前海地區三大地主嘅招商局集團、深圳國際（00152）同中集（02039），相關股份備受追捧，其中中集股價創新高16.6元，收市升18%；深國「發市當三年」，股價一口氣升兩成；只係公司名稱有「深圳」二字嘅深圳科技（00106），掹車邊升得仲勁，升幅達四成。即使係藍籌股嘅招商局（00144），一樣好似股仔咁炒，升幅8.8%，市值單日升逾半百億元！同樣被視為受惠者嘅招商地產，其買殼嘅東力實業（00978），股價勁飆兩成。

中國無線落後可吼

其實除咗前海概念股之外，尋日見到唔少板塊氣氛都唔曳，好似多隻內銀股股價再創一年高位，農行（01288）上番4元樓上未見太大回吐，尋日收報4.13元，升得上呢啲蟹貨區認真唔簡單！電訊設備股中興通訊（00763）周初發盈警後下試14元支持，尋日迅即收復15元關，收報15.28元，升4.95%，連帶同類股京信通信（02342）亦升逾半成，反觀隻中國無線（02369）表現相對滯後，睇吓會唔會後發先至。

至於光伏股，阿莊走早咗隻興業（00750），尋日高位8.99元。執筆時聽到卡姆丹克（00712）配股集資，睇怕隻興業炒到呢啲水平有意抽水亦唔出奇，所以都係忍手繼續做旁觀者。

尋日阿莊話中小型內房股有條件炒落後，提及嘅人和商業（01387）升4%，華南城（01668）升2%，恒盛（00845）升3%。睇見「深圳」股炒到慶合合，留意咗隻沿海家園（01124），尋日股價升7%，收報0.7元，事關沿海嘅第二大股東就係深圳控股（00604）。深控日前停牌，有待發行新股及主要交易，睇怕復牌股價又係坐火箭！

講番沿海，既與深圳系股份有關係，去年十月公司才與深控進行資產互換，藉此減輕負債。尋日睇見深國同深圳科技股價急升後，尾市未有太大嘅回吐壓力，尤其係深國成交額達到18.8億元，相信短線股價仲有得去，當主角繼續飆高，周邊嘅配角都會跟住炒，照計沿海亦有條件坐順風車。尋日該股收報0.7元，短炒首站目標先睇0.8元，跌穿0.66元止蝕。