樓市出更：業主反攻 兩周賣貴40萬

市旺加上放盤少，買家出招搶盤，業主亦不甘示弱反擊，除咗放盤可以吊高嚟賣，更可以賠訂再賣，賺到盡。今個星期起市場已經有至少3宗賠訂個案，其中藍田居屋康華苑「辣招盤」，賠訂再賣貴逾23萬至290萬元外，同時SSD亦由10%變5%，雙重着數。另外，馬鞍山新港城賠訂細單位，兩星期內重售亦賣貴40萬元。

世紀21聯誠謝寶昭同劉Sir講，市場無盤，樓價再升，好似居屋康華苑A座中層上年一月買入嘅「辣招盤」，上月尾白表賣266.8萬元，業主見市好賠訂，「一口價」再賣290萬元，雖然扣埋訂同佣金，只賺多約13萬元，但SSD由10%變5%都已有「着數」，建築/實用呎價5,620/7,632元。

廣林苑趁爭購反十萬

公屋業主都賠訂，據悉黃大仙竹園北邨有個梅園樓單位，原本白表賣218萬元，補地價由雙方負擔，但業主近排都賠訂10萬元唔賣，有傳個單位有綠表客畀業主原開價再多15萬洽購；同屋苑桃園樓高層單位，傳近期綠表都賣200萬元。

公屋同居屋多人搶係人都知，世紀21奇豐周淑萍話，沙田廣林苑C座高層5室，放盤後畀三組客爭，反價10萬賣280萬元，實用呎價7,292元。

有代理爆料，上述新港城N座中層7室單位，今個月初賣咗318萬元，新買家都落咗約10萬元訂，但個市旺到唔夠盤，啱啱再有買家畀到358萬元，業主見賠埋訂同佣金仲有成20萬元執，即刻重售單位，建築呎價逾8,000元。

另外，中原林少億話，同區翠擁華庭11座中層D室，業主加價10萬元，惟市場無盤，新買家再追價3萬元後，以約633萬元買咗，建築呎價7,057元。

聽中原陳輝麟話，青衣盈翠半島11座中層有維港煙花海景單位，賣950萬元，建築/實用呎價9,804/12,306元。

第一城交投料達百宗

藍籌盤交投再升，美聯黃錦瀚話，沙田第一城今個月有約91宗買賣，預料很大機會達百宗，成交包括一個47座單位，與曾發生事故單位同層，都賣到301萬元，低市價10%。該行林海成講，荔枝角美孚新邨過去兩日都錄至少6宗成交。