股海實戰：東航起飛最後召集

本來預期港股會有調整，誰知上周恒指不跌反升三百幾點，至23,601點收市，表現較預期強，主要係施政報告未有再針對樓市炒風出「辣招」，地產股喺消除短期不明朗因素下紛紛上試高位，加上見到上周初內地A股滬綜指2,300點失而復得後回穩，內險、內銀及內房股亦跟隨回勇。咁搞法，本周恒指再創五十二周高位機會大，仍不能排除後市抽穿24,000點關嘅可能性。阿莊都係嗰句，魚缸咁熱鬧，好難做到離場觀望不食人間煙火，總之記住呢浸最緊要識得控制注碼，咪愈買愈多就得。

中國製藥勢見3元

上周阿莊買入嘅中國製藥（01093）走勢幾對辦，上周五收市報2.87元。原來最近花旗就該股發表報告，睇好公司由原材料藥轉攻成藥業務嘅策略，首次給予買入評級，目標價睇3.3元。公司將易名為「石藥集團」，相信新名稱更能體現母公司嘅支持，股價見3字頭無懸念。

內地上周最新公布嘅經濟數據優於預期，係支持短期中資股繼續領跑嘅重要因素。上周阿莊提及嘅騰訊（00700）已升越270元關，快嘅話相信周內可挑戰五十二周高位281元。此外，中資航空股抖氣經已抖咗成個禮拜，上周五見隻中國國航（00753）蠢蠢欲動，東航（00670）及南航（01055）整固亦近尾聲，本周可重點留意板塊動靜。

去年第四季，內地航空業尚處谷底，特別是貨運需求仍然疲弱，油價高企不下，加上京廣高鐵通車分流客源。不過，中資股氣氛佳，喺資金搜購之下，航空股亦成為追落後對象，理由不外乎係憧憬業務隨經濟復甦而回升、押注今年人民幣升值，以及京廣高鐵分流作用已反映在估值上等等。近日有消息指，內地航空公司去年盈利按年跌22%至211億元人民幣，踏入今年首季，春節假期旅遊旺季帶動客運，料按季數字有改善空間。

再睇自去年十二月以來三隻中資航空股表現，國航、東航及南航股價分別累升42%、38%及29.5%。本來論業務分布及往績，阿莊屬意國航，但考慮到旗下國際航線業務表現可能比想像中差，故都決定改為喺東航同南航中二選其一。雖然南航股價表現相對落後，但論好炒，都係東航勝一籌。走勢上，東航上周見高位3.68元後進行整固，成交明顯縮減，反映沽壓並不大。參考十二月升浪，調整幅度由高位回落一成以內，趁尚未起步入市收集，下浪目標睇4至4.2元區域，不跌穿3.3元可繼續持有。