樓市出更：荃灣西站六區壓軸爭霸

政府銳意透過增加土地供應去解決供求失衡問題，呢份決心劉Sir都感受到，好似今個星期就有兩個住宅項目截標，分別係今日同星期五截標嘅西鐵荃灣西站六區同埋屯門掃管笏第56區限量地，總共可以提供近1,400個單位，施政報告後暫未有測量師調整地皮估值，不過有測量師老友覺得荃灣西站六區隨時有多過10組財團入標，市場估計兩幅地皮可以為庫房帶來最多約44億元收益。

今日截標嘅荃灣西站六區限呎項目，項目提供大約894伙單位，但規定咗其中約58%單位為中小型戶，但上個月截收意向時，仍收到鐵路項目新高紀錄嘅18份意向書，包括經已喺區內「插旗」嘅長實（00001）同華懋集團，都有遞交「入場券」。

荃灣樓面地價料四千

高緯環球張翹楚同劉Sir講，施政報告有提及過未來土地供應初步數字同地區，但其實係市場期望之內，所以未有對招標土地估值作出調整。

佢話荃灣西站六區限呎項目位置唔及舊年批出嘅荃灣西站五區灣畔咁好，所以估計每方呎樓面地價大約4,000元，即係比灣畔低約7.2%，估值約27億元，佢仲估計最終標書數目有機會多過10份。

但講到底，呢個鐵路上蓋項目都係區內最後一幅同類地皮，預期競爭激烈。

屯門地限建480單位

而屯門係未來土地供應其中一個主要地區，今個星期五截標嘅屯門掃管笏第56區掃管笏路限量地，就限建460至480個單位，張翹楚話，掃管笏一帶未有鐵路支援，加上項目有單位限制，都幾難「豪宅化」，所以覺地皮「貴極有限」，估值大約11.3億元。為市場下限價，最高估值約15億元。

港鐵（00066）天水圍輕鐵天榮站上蓋項目，今個星期四截收財團意向，估計提供1,600個中小型單位，即連同上述荃灣西站六區同屯門掃管笏第56區限量地，三個項目可以中短期提供約莫2,974伙住宅供應。