市場徐想：新思維 應對高樓價

特首啱啱發表完施政報告，社會上唔同嘅社群都有唔同嘅回響，例如房屋政策、土地政策等。不過，Prof. J覺得既然大環境嘅步伐唔同咗，我哋都要適當調整吓自己，先可以與時並進！

相信有好多朋友都有「成家立室」嘅想法，結婚都係想組織小家庭。但私樓樓價喺過去四年升咗84%，擺得酒嚟又要諗首期，所以「公屋新人」數字亦持續上升。由○九年只有7%到舊年18%，升幅達157%；而只有56%受訪者住得起私樓，比以往大跌兩成。

今時今日，連深水埗80呎超豪劏房月租都要6,000幾蚊，似乎「有樓先結」已經變得唔現實。因此多咗未上到車嘅朋友租住樓先，婚後 租樓嘅新人喺過去四年飆升10%到43%。呢啲就係因為環境唔同咗，思想同行為跟住改變。