股海實戰：蒙牛估值吸引追落後

諗住大市要調整，點知跌極都跌唔落，係咪真係要暢遊一轉24,000點水平先肯罷休？雖然阿莊對後市再升信心不足，但亦唔敢講冇可能。反正升市末段炒作難度大增係必然，總之睇實資金流，邊度人氣旺就細細注跟炒。尋日提過嘅天能（00819）果然唔錯，就以均價5.32元買入4萬股，短線大成交踢穿五十二周高位5.52元有景！

尋日話騰訊（00700）異動可吼，見到唔少大盤積極吸納，心郁郁想買隻騰訊Call輪傍吓身。呢期IT股變得熱鬧，其中一個原因係盛傳阿里巴巴集團已委任投行安排上市申請，擬集資近300億元，咁大規模嘅集資活動，惹來憧憬整個板塊將醞釀一擁而上營造利好氣氛，當中唔少得龍頭股騰訊嘅一份，但萬料不到尋日跑出嘅居然係隻體育用品股中國動向（03818），原來公司早喺去年十月初宣布斥資1億美元投資阿里巴巴集團，怪不得尋日股價搶高至1.4元，收報1.3元，升13%，希望呢項投資可以賺番多少，幫補吓經營壓力甚大嘅體育用品業務。

家電股有潛在風險

海信科龍（00921）發盈喜，預計去年度純利將同比增長2至2.5倍，至介乎6.8至7.9億元人仔，皆因收入及毛利率均告上升，且去年末季子公司股權轉讓等非經常性損益同比增長較大。受盈喜消息刺激，科龍股價尋日急升近8%，收報3.66元，計落估值仲係平。之不過，呢期買入家電股要注意一個風險，就係持續五年有多嘅家電下鄉政策將於本月底全部到期，至今為止未見到有接續政策。本來由政府補貼就唔係長久之策，不過促進消費仍然係推動內需嘅主要手段，阿爺會唔會失驚無神再度出招，阿莊都冇水晶球，只有提醒家電股炒家，要注意短期產業政策風險。

除咗盈喜股之外，尋日隻基金股蒙牛乳業（02319）表現亦好醒神，股價突破24元關，高位見24.1元，升2%，似乎本月以來幾場路演之後，隻「牛仔」真係生猛番晒﹗聽聞先後有幫手搞推介會嘅包括大摩、野村同瑞銀，而基金都支持蒙牛嘅五年大計，又話蒙牛嘅銷售已回復至毒奶事件之前嘅正常水平，睇好公司前景，野村就將蒙牛嘅目標價由19元大幅調高至30元。

阿莊都唔只一次講過，泊咗中糧大碼頭嘅蒙牛可望脫胎換骨，去年係整合年，今年有望逐步反映協同效益。喺一眾大型食品股中，蒙牛一二及一三年度預測市盈率才23及18倍，估值仲算係平，相信追落後故事未完，24元邊或樓下跟進，首站目標上望28元，失守22元止蝕。