樓市出更：車位開價重手加4成

近月住宅樓價愈做愈高，連銀主盤加價都被搶高賣出，唔少物業估值都跟住調升，好似早排延期拍賣，屬於中國銀行廣東開平支行前行長許超凡等人，涉挪用巨額公款被法院出售抵債嘅火炭銀禧花園車位，被調高四成至63萬元開價推拍，同區樂怡小築低層住宅亦調高至1,422萬元拍賣。

許超凡等名下2項物業，因為文件問題由舊年延期至今個月底拍賣，拍賣行老友同劉Sir講，由於近月市況做好，佢等名下嘅樂怡小築低層單位，銀行估價由原來約1,700萬，增至1,800萬元，所以物業連車位嘅拍賣開價，亦由原來嘅1,318.5萬，調升7.8%至1,422萬，單位建築/實用面積1,624/1,385方呎。

青龍頭無契戶搶貴10%

至於同場拍賣嘅銀禧花園一個單號車位，連約拍賣開價亦加價至63萬元，比舊年十月時的開價45萬元，急升40%。事實上，呢期樓市氣氛認真唔錯，因為估價調升而加價再賣嘅奧運站柏景灣複式銀主盤，早兩日亦被搶高17%至3,250萬元易手，相信上述物業都有機會賣到好價錢。

此外，青龍頭一個無契村屋單位承押記人命尋日拍賣，建築/實用面積700/613方呎，減價至175萬元再拍吸客，亦獲搶高約10.3%至193萬元賣出。

藍天車位超購傳炒籌

有代理向劉Sir報料，話香港興業籌備拆售旗下東涌藍天海岸約450個車位，市傳已超額認購逾2.4倍，更出現炒籌情況，一個前10位嘅籌號，更以10餘萬元成交；據悉，該批車位定價約50餘萬至60餘萬元。

劉Sir收到風，張姓投資者以確認人身份放售旺角彌敦道724及726號20樓商用樓花全層，意向價近6,000萬元，較一周前高12%。利嘉閣話，同區彌敦道703及705號19樓頂層商用樓花等部分亦放售摸貨，意向價5,000萬元，較數周前購入價高23%。