股海實戰：神州數碼 趁低收集

元月以來港股一直喺高位運行，但A股唔跟。兩條腿得一條識行，結果上周五恒指先升後跌，雖然跌幅唔係大，但當炒板塊出現明顯回吐，想撈底都要嚴限注碼！

上周四沽咗滬杭甬（00576）同興業（00750），眼見中資股上升動力減退，地產股亦已紛紛創五十二周高，阿莊維持現水平追入重磅股值博率不高嘅睇法，上周五遂沽出手持嘅港交所（00388），暫時兩袖清風，但重申沽貨只係純粹預計市況將作調整，唔等於係要做大淡友，相信個別中資板塊仍可提供炒作機會，故嚟緊仍會睇位落場小注跟炒個別股份。

近一個月針對光伏業推出嘅國策足以叫呢個沉睡逾年嘅弱勢板塊甦醒過來，繼續捕捉國策動向，傳聞智慧城市指導政策將於季內出台，初步估計「十二五」期間智慧城市投資總規模將突破5,000億人仔，各地智慧城市建設將帶來兩萬億人仔嘅產業機會。其實，究竟怎樣才算係一個「智慧城市」，官方尚未有明文規定，為了規範發展，以免浮誇建設、浪費資源，出台指導政策實有其必要。

中國城軌有得諗

建設智慧城市涉及嘅範疇好多，如交通、電子政務、醫療、物聯網、教育訊息化等等，故稱得上受惠股嘅為數不少。針對交通方面，興建城軌進行大型集體運輸係大勢所趨，創業板有隻中國城市軌道科技（08240），正係專門從事相關應用解決方案嘅公司，去年五月掛牌，招股價1元，過去兩個財年（截至六月底止）純利翻一番，去年度賺8,000萬元，如無意外最快今年第三季可以申請轉主板掛牌，有耐心坐貨嘅，可以認真研究一下。

主板方面，實力股有神州數碼（00861）。該股主席上周配售公司股份，因市場反應佳，最終涉額增至10億元。近幾年公司做出成績，但股份市場流動量並不太活躍，目前有兩個基金揸住神數超過5%股權，一有現有股東配售，基金求貨熱烈可予理解。

事實上，早喺一○年神數已將拓展智能城市戰略定為其第三個五年計劃嘅重點。若到其官方網站，可見到詳細嘅內容解說。公司運作透明度高，發展策略清晰，目標正確，正是其獲得基金垂青嘅主要原因。上周減持消息一出，股價回軟，料消化相關消息後，股價可重拾升軌。喺12元邊或樓下，中長線值得收集，以一三年度預測市盈率12倍計算，目標價可定喺15.6元，支持位可參考五十二周低位11.38元。