樓市出更：新勾地表冀谷3千伙

增加土地供應係政府未來一個重要課題，政府早排建議改劃多幅土地做住宅發展，劉Sir認為，為谷供應量政府有可能會將部分未「完全轉型」住宅地，連同已改用途地皮，一併納入下年度勾地表；預計新勾地表地皮，好大機會會包括九龍塘前李惠利分校、九龍畢架山半山前龍坪道臨屋區地皮，同埋新界大埔白石角臨海地等等，加加埋埋相信都有超過3,000個單位供應，最少市值約260億元。

新一份施政報告即將公布，增加土地供應將會係重要嘅議題，劉Sir相信政府除咗會加入啟德新發展區同沙田九肚等呢啲「穩膽」地段地皮，相信政府會將部分未完成改劃用途土地納入勾地表。

聯福道地改中密度

睇番本年度的勾地表，市區同大型嘅地皮真係唔多夠，政府可能會加大力度去填補，好似九龍塘聯福道前香港專業教育學院李惠利分校南面部分，最近就改劃發展中密度住宅，計劃提供495個平均面積約861平方呎嘅單位，估值大約78.9億元。

至於早已通過改劃住宅嘅九龍畢架山半山前龍坪道臨屋區地皮，亦預計將會納入新一年度勾地表，料可帶來逾370伙豪宅新供應；另灣仔堅尼地道99號灣仔分科診所及皇后大道東269號呂祺教育服務中心，就好大機會合併為一幅地並出現喺新勾地表入面。

白石角矚目值109億

不過市區地始終有限，新增土地供應重任，難免要依賴新界區，劉Sir知道，大埔白石角海濱長廊及科研路交界臨海地比較有分量，總樓面達約145.4萬方呎，料提供逾1,400伙，估值約109.1億元，相信係下年度供應重點地皮之一。

而其餘有望加入新年度勾地表新界地，包括上水古洞南前建德公立學校、西貢對面海康健路及康村路兩幅土地等多個地盤等，就算規模唔大，但「山大斬埋有柴」，都有助紓緩供應。

舊年底建議改劃用途嘅壽臣山道西及黃竹坑徑交界一幅政府地，城規會喺審議前有委員建議將地盤擴至隔籬中壽臣山苗圃，未必可趕及納入新勾地表。