市場徐想：國泰君安 受惠B轉H

今年一開波，成個港股都熱辣辣，隨着「B轉H股」行動正式開綠燈，港交所（00388）已經即刻踩行油。除咗港交所外，一啲券商股同樣受惠於「B轉H」行動，而Prof. J就特別留意啱啱引入咗社保基金做股東嘅國泰君安國際（01788）喇。

內地B股流通量不足，一早就有傳要解決呢啲歷史遺留落下來嘅問題。中集集團（02039）已率先以介紹形式來港上市，雖然無公開發行H股新股，但就開創咗「B轉H」股先河，但係同內地券商有咩關係呢？

就好似今次中集B轉H，佢哋就委任咗國泰君安做獨家保薦人，內地嘅企業搵番內地啲券商，點都同聲同氣啲。國泰君安引入社保基金後，對於爭取更多新股上市包銷業務會有正面幫助，故睇好佢今年來自呢個業務嘅盈利會有突破。