股海實戰：光國醖釀新升浪

恒指尋日高收逾百點，但唔少近期熱炒嘅股份高開低收，咁嘅現象顯示短期市場風險正在上升。阿莊都係嗰句，每次升市升到股仔瘋炒呢段路，都係高風險高回報，但唔知音樂一停邊個冇櫈坐，缸邊友見機行事，最重要都係量力而為，冇得輸打贏要！

近日大市調整守穩23,000點水平，尋日內房、太陽能股高位回吐，又輪到汽車、航空及航運股接力，本地地產股更迭創五十二周高，喺「跌唔落」嘅情況下，大戶要推恒指上24,000點或樓上散貨唔係冇可能。阿莊按計劃沽出滬杭甬（00576），另見光伏股現疲態，且聽聞短期又有光伏股密謀批股抽水，遂沽出興業（00750）。至於隻信義玻璃（00868），動力遜預期，尋日下晝開市冇耐沽出。如今持倉只剩港交所（00388），尋日高位148.5元，與五十二周高位148.9元相差不遠，會睇多一陣再作打算。

補充一句，阿莊短線唔會唔買貨，仍會小注怡情跟炒落後股，炒多個多禮拜就要準備提早收爐！尋日提到風電股有錢到，推介嘅金風（02208）升逾8%。其實新能源範疇好大，環保水務、垃圾發電都係呢一類。講到呢度，發現呢兩、三個月大市做好，但隻光大國際（00257）好似冇咩點行過，有條件追落後。

負面消息影響淡化

印象中，今年三、四月，一名中共高層涉貪被捕，惹來當時媒體大肆報道關於光國一名董事家庭背景嘅相關情況，致使公司股價一度受壓，但在四月下旬該名董事辭任，公司亦澄清運作一切正常，但股價反彈過後轉向橫行，即使近兩個月大市炒到㷫合合，其股價仍無動於衷。阿莊相信，光國嘅重要支持係來自大股東光大集團，一名董事嘅去留唔會左右到公司嘅發展。再講，呢幾年光國經營表現卓越，係一隻專注從事環保相關業務，而盈利又能保持增長嘅優質中資企業。當整體中資股估值明顯回升，無道理少光國一份。

去年上半年，光國賺6.05億元，同比增長72%，下半年經營環境穩定，可見去年度業績有保證。去年八月公司曾透過摩通配股集資12億元，配股價每股3.58元。尋日該股收報4元，乃去年十月下旬以來嘅收市新高，成交股數按日翻一番有多，有熱身迹象。畢竟股價喺3至4元經已行咗成年，交得出成績，股價謀突破亦理所當然，目前主要阻力區喺4至4.5元，一旦以大成交突破，將展新升浪，近次配股價為支持位提供參與，可以小注一試。