樓市出更：工轉商補價 年貴66%

政府起動九龍東，炒起全區商用物業做價，有代理同劉Sir講，億京發展喺九龍灣嘅宏光道6號工轉商重建項目，早前批出最新補地價去到每呎差唔多5,000元，已經係全港同類歷來最高每呎補價。事實上，齋買地起商廈，每呎都只係五千幾元，買幢工廈重建，已經有成本，轉做商廈又要向政府補價，仲要拆樓，唔怪得有發展商同劉Sir講，買地起樓仲划算。

近排觀塘有新建商廈樓花摸上摸呎價去到差唔多萬三元，補地價自然水漲船高。有代理爆料，話億京發展位於九龍灣宏光道6號工轉商重建項目補地價傾到尾聲，每方呎達5,000元。

年中賣現樓 呎價睇萬元

仲記得億京發展項目策劃經理黎裕宗舊年春節同劉Sir講，上述項目每方呎補地價講緊3,000幾元，若果真係傾掂每方呎補地價5,000元，即年內升幅超過66%。

睇番舊年十一月，上述常悅道、宏泰道與宏遠街交界一幅商貿地，透過招標以18.18億元賣出，每方呎樓面地價約5,458元，相比之下，工轉商補價確實好貴。唔怪得好多發展商話，第日寧願買官地，原因係補地價愈來愈貴，同時成個發展投資額較易計數。

上址重建後總樓面約26萬方呎計，單係補地價要13億元，連同購入價等開支，總投資相信要19億元。有代理話，上址依家起到近頂樓，相信最快今年中有現樓賣，睇怕呎價最少1萬元。

至於該集團今年賣樓頭炮會係長沙灣利行工業大廈工轉商重建項目，最快四月賣，呎價睇1萬元。

尹柏權6.8億買美孚巨舖

商場舖位有捧場客，增強投資者吸納信心，據悉，投資者尹柏權啱啱斥約6.8億元，向「舖王」鄧成波買咗荔枝角美孚廣場地下至2樓共一籃子商舖，呎價約萬四，或喺今個農曆新年拆散賣；若上述成交屬實，鄧成波帳面袋3.6億元，賺幅逾1.1倍。

近排工商舖交投理想，中原（工商舖）營運總監潘志明話，該公司舊年營業額8.7億元，按年多七成，今年會將人手增加超過四成至逾千人，並擴充分行，所以今年目標營業額睇11億元。