魚缸Blogger：真明麗 可小注收集

尋日隻LED股真明麗 （01868）逆市做好，喺成交急增下升逾半成，以接近全日高位2.17元收市，即市一度上試一二年三月的五十二周高位2.2元，有見公司股價自去年九月起沿住10日線同20日線反彈，今轉如果成功突破阻力，睇勢話唔定就快可以破頂，兼重返一一年七月高位2.46元。

行業獲國策扶持

雖然LED股並唔係近期熱炒焦點，不過呢個行業嘅發展前景不俗，事關照明業務已經同環保節能扯上關係，獲內地政策扶持。除咗旗下子公司喺半導體照明產品財政補貼推廣項目中入圍外，去年真明麗嘅生產技術亦取得突破，研發出LED光源模組化生產流程模式同日光燈管COB，該技術可有效降低生產成本、提高照明燈具光效同環保節能優勢，帶嚟盈利增長動力。睇番成績表，公司中期扭虧為盈，趁仲畀人忽略嘅時候，可以小注收集，博佢隨時爆上。

真明麗 （01868）

阻力位：2.46元

支持位：2.00元