股海實戰：中國無線 動力增強

雖然尋日恒指跌唔夠1%，但內險股跌勢甚兇，一來受凱雷悉售太保（02601）股份消息打擊，二來滙控（00005）出售平保（02318）股份一事可能受阻亦影響板塊氣氛，國壽（02628）、新華保險（01336）、財險（02328）跌幅達3至4%，反而隻半新股人保（01339）表現堅挺，逆市升1.4%收市。正所謂莫買當頭跌，都係暫時迴避內險股為妙。

呢期當炒嘅中資股普遍急回，反觀一直表現不濟嘅卻逆市做好，典型例子有藍籌股康師傅（00322）同旺旺（00151），股價升2至4%，係咪預示資金開始從超買股流往防守性股份，仲要睇多幾日先可以下判語。事實上，呢期A股表現跟唔上，令投資者持貨信心受動搖，再加上平保事件可能與權鬥有關，提防兩會前後一旦高掛「反貪」大旗，兩地魚缸會有一番震盪。

內房股難望再暴漲

講到中資股，除咗內險股，其實內房股短期風險亦值得關注，事關去年度銷售數字早已在市場預期之內，嚟緊冇咩特別利好消息。再講內房股呢轉一口氣升咗三、四個月，相信大戶回報相當唔錯，嚟緊一季好大機會轉換炒作主題，內房股即使唔大跌都難再如過去幾個月般大升，故持貨者可考慮鎖定利潤，或轉移目標至醫藥、汽車及家電等板塊。至於阿莊嘅組合，維持周內睇位沽出滬杭甬（00576）食胡，另港交所（00388）逼近五十二周高位148.9元亦會考慮沽貨走一轉。

每次細價股轉熱，都預示市況調整將至，今次也不例外。呢期熱炒嘅太陽能股同頁岩氣股回吐幅度較大，部分流出嘅資金轉移至電訊設備股，呢幾日見中興通訊（00763）同京信通信（02342）走勢都唔差，尋日就輪到隻中國無線（02369）逆市起步，由全日低位2.43元抽到上全日高位2.66元，收報2.61元，升6.97%，成交2.51億元，在跌市中表現相當搶鏡。

上月阿莊亦曾品評過中國無線，話喺電訊營運商增加終端補貼嘅情況下，公司積極開拓嘅新一代網絡智能終端產品將會受惠。再睇過去一個月股價一如所料受制於前年五月嘅下跌裂口位2.53至2.83元，當時阿莊話守住2.2元可繼續持有，結果至今果然守穩其上，尋日以大成交升穿2.6元，14日RSI動力增強，今轉有勢回補裂口，上試2.8至2.9元區域，支持位上移至2.45元。