股海實戰：聯想見8元冇難度

一三年首周魚缸表現理想，上周四個交易日恒指最多升734點，埋單計亦升664點，希望開個好頭！不過，上周市況有兩點要注意，首先，A股元旦後復市，滬綜指僅微升7點收市，報2,276點，若然短期尚受制於2,300點，提防會出現調整。見到上周五本港中資金融股亦現疲態，中資股熱是否開始減退值得關注。其次是開始見到唔少二、三線股起動，每次升市到最後階段都會出現類似嘅情況，意味風險正在上升。若然今浪賺到錢，到咗呢一刻，係時候檢討持倉風險，鎖定利潤，醜股唔係唔可以跟炒，但切記別瞓身下注，免得貪勝不知輸！

滬杭甬有大盤力吸

上月下旬阿莊沽咗隻保利協鑫（03800），諗住喺1.5元水平翻兜，點知揸住隻興業太陽能（00750）就唔識郁。上周五保利協鑫挾到上高位見1.85元，好在隻興業都升穿7元，收報7.13元，升3.9%。另外，見到隻滬杭甬（00576）成交持續增加，有大盤積極吸納，擔定櫈仔等睇戲！

國美（00493）上周發力，上周五大市調整，見早上該股股價企穩1.04元樓上，已知走勢相當硬淨，午後果然又開TURBO，高位掃到上1.14元，收報1.13元，升6%。就連米蘭站（01150）都藉本地零售數據炒上，股價急升兩成三。依照愈低殘愈值博嘅短炒心態尋寶，本周會睇實CEC（00759）、中聚電池（00729）、晶門（02878）、中芯（00981）等細價股動向。

至於大價股，睇來睇去，發覺近月隻聯想（00992）股價冇咩升過，上月中上過7.69元就反覆回軟，除夕日股價低見6.99元始回穩，上周五收報7.5元，升2.74%，主要受公司已完成收購巴西電腦製造及經銷商嘅消息刺激。講到聯想，其實亦甚具城鎮化概念。當城市人口不斷擴張，每家一電腦，將再次帶動桌上電腦需求，加上智能手機應用日益普及，隨着勞工成本上升，能花費得起買智能手機嘅用戶群亦在擴張，可見聯想兩大主營業務亦可受惠城鎮化嘅大趨勢。

去年聯想已成功鞏固在全球PC市場嘅領導地位，今年可望分享城鎮化所帶來嘅機遇，業務更上層樓，為明年母公司謀求整體上市造勢。再睇股價走勢，14日RSI現處60，若本周確認出現黃金交叉（10日線升穿50日線），短線要突破五十二周高位7.71元難度不大，直望8元大關，回吐宜守7.2元。