樓市出更：卑路乍街舖租準備起飛

講咗好耐嘅港鐵（00066）西港島線，預計一四年就通車，好多舖壇老手早排已落區頻頻掃貨，其中以區內最旺嘅卑路乍街最搶手；「小巴大王」馬亞木同埋兆安李太等五位資深投資者舊年都有喺條街入貨，涉及金額加埋超過5.7億元，價、量咁高，係近年罕見。近幾年卑路乍街地舖租金升幅唔算明顯，但有代理估計，今年條街地舖新簽租約，相信有至少五成升幅。

有西環區代理同劉Sir講，依家西環零售熱點以卑路乍街一段為主，原因係條街鄰近西港島線堅尼地城站，同埋附近有幾個大型新盤如新地（00016）嘅Imperial Kennedy等，所以唔少投資者都（目及）實條街嘅商舖。

其中，早年已入市西環嘅投資者馬亞木，舊年就重投舊地，用3.8億元買咗卑路乍街同爹核士街聯基新樓等一籃子地舖同1樓商舖，總樓面約5萬方呎，估計新租金收租回報差唔多3厘。另外，好少喺港島西掃舖嘅兆安李太，亦以約9,100萬元買咗卑路乍街3號地下部分。

連鎖商戶大舉進駐

好多「大孖沙」都喺卑路乍街買舖，查實原因之一係條街商戶近幾年大執位所致。依家卑路乍街介乎爹核士街與北街嘅一段，商舖數目大約70幾個，佔約三成係近幾年至「西移」過嚟嘅連鎖經營店舖，部分仲係走中高檔嘅咖啡店等餐飲集團，現時該整段街道呎租約30至近100元不等，其中一間便利店早排租嘅雙號地舖，月租大約5.5萬元，呎租約42元，比之前升咗近15%。

代理估租金加五成

連鎖店以銀彈搶租卑路乍街核心地舖，有賣開民生用品嘅小商戶已打定輸數，等業主開聲大幅加租，區內有代理估計，加幅唔會少過五成。

其中，喺卑路乍街租舖經營五金店十多年嘅周先生話，「依家月租只係5萬幾，租約一四年到期，如果業主狂加租，都好難唔搬呀！」

另外，喺卑路乍街租地舖開餐廳三十幾年嘅周太同劉Sir講，「卑路乍街依家多咗好多連鎖食店，生意分薄晒，若果大幅加租，生意一定百上加斤。」