魚缸Blogger：國美 仍有上升水位

尋日家電股成功跑出，其中國美電器（00493）出現報復式反彈，踩油升穿五個幾月都無見過嘅1蚊關，以全日高位1.06元收市，飆逾一成，突然爆上皆因去年嚴重跑輸大市，有興趣追落後的話，可以(目及)實。

國美近日公布咗未來三年嘅戰略目標，將會鞏固一級市場地位，擴充二、三線城市業務，並建設及升級電子商務平台「國美在線」同「庫巴網」，前者自營業務包括家具、母嬰及體育用品等，而後者亦已有逾三千品牌旗艦店進駐。公司線上線下協同發展，逐漸去電器化，早前更大搞促銷活動。雖然家電零售商比生產商蝕底，不過去年國美同匯銀股價跌得太甘，尋日匯銀咁樣挾法，國美嘅升幅並唔過分，相信後市仲有得去，小注博佢踢上1.3元。

國美電器（00493）

阻力位：1.30元

支持位：0.93元