股海實戰：騰訊有力重上高位

港股尋日大部分時間喺高位整固，曾經倒跌，但尾市又再回升，結果恒指收報23,398點，升86點，成交增至893億元。今日A股復市，若然市況同樣癲狂，恒指呢浪有機會一試前年五月底高位23,707點才進行調整。

今轉港股升得咁急，某程度係班基金經理冇揸重貨過假期，結果長假後歸位見到個市飆咗上去，惟有硬着頭皮落場追貨，唔排除追貨潮會延續至下周初，之後就要抖一抖，但大漲小回格局未變。

滬杭甬快見7字頭

前日買入嘅恒大（03333）走高，順利以4.6元沽出，又一次短炒成功。尋日提到手持嘅中旅（00308）太不像樣，惟有沽之哉，換入尋日推介嘅信義玻璃（00868）4萬股。此外，組合中嘅滬杭甬（00576）終於起動，高位見6.42元，成交4,994萬元。上月以來，中信証券（06030）及海通證券（06837）股價累升幅度介乎四至五成，咁計落滬杭甬旗下擬分拆到A股上市嘅浙商證券，身價亦已升值不少，偏偏同期滬杭甬股價升幅僅單位數字，明顯落後，等基金收齊貨，相信好快見7字頭！

細價股都開始積聚到人氣，尋日提及嘅文化中國（01060）上咗二十大升幅榜，另外盈警股國美（00493）股價浮浮沉沉大半個月，尋日亦不甘寂寞嚟支大陽燭，抽上全日高位1.06元收市，升幅逾10%，成交5.58億元，呢轉有機會踢上1.2元樓上先至識停！

藍籌中，騰訊（00700）表現亦十分滯後，但近日市場不斷流傳，騰訊今年有望獲發虛擬營運牌照，在電訊業中分一杯羹，若然呢個消息屬實，有望成為刺激股價表現嘅催化劑。

事實上，騰訊旗下QQ活躍用戶已達到七億個，「微信」（WeChat）亦大熱，註冊用戶數已達三億個，難怪有指以用戶量計，騰訊早已成為全國第二大運營商，僅次於中國移動。對於「微信」快速冒起，短訊業務受挫嘅中移意見頗大，但據講近日雙方已就此達成協議，和氣生財作結。未來騰訊嘅核心業務發展空間巨大，股價有望繼續享有較高嘅估值。

騰訊股價前日重上10日及50日線後，尋日更進一步，重上250日線樓上收市，短線有勢回補去年十一月中旬嘅下跌裂口位頂部266.2元，首季目標突破五十二周高位281元，245至250元乃重要支持區。