樓市出更：綠表客起哄 變奪寶奇兵

部分白表買家可買綠表居屋單位，令綠表客即時搶閘睇樓、入市，牛池灣嘉峰臺有綠表買家驚樓價今年再升，即以390萬元創屋苑綠表新高價入市。另近排粉嶺居屋睇樓量多三至四成，其中昌盛苑近日連錄2宗成交。

富誠地產陳錫金同劉Sir講，嘉峰臺4座高層B室，建築/實用面積691/589方呎，啱啱以綠表價390萬元成交。

嘉峰臺新高 昌盛苑開齋

佢仲話，嘉峰臺呢個成交單位嘅建築/實用呎價達5,644/6,621元，兩個價創晒屋苑綠表市場新高；而買家係公務員，除咗有自住需要，仲擔心之後部分白表買家可免補地價入市，到時就會搶貴晒，寧願「早買早享受」。

中原陳永強都話，近排粉嶺居屋睇樓量多咗三至四成，一向唔算太活躍嘅昌盛苑，近日都賣咗兩個單位，其中一個D座高層5室，綠表賣258萬元。世紀21聯誠謝寶昭話，藍田區都有部分打算申請白表買綠表居屋嘅家庭客，最近「偷步」到區內預約睇樓，不過現時綠表放盤有限，其中油翠苑同鯉安苑目前綠表放盤「十隻手指」數得晒。睇番利嘉閣報告，原來上年只有6,535宗二手居屋買賣登記，屬沙士後九年新低。

收租客破頂價購青怡

至於青衣區亦受到綠悠雅苑開賣嘅消息帶動，區內樓價不斷咁升。聽美聯曾偉明講，青怡花園6座中層E室連租約單位，由收租客以325萬元買入，建築/實用呎價7,523/9,475元，呎價貴絕全屋苑，該單位兩年半升值近65%。中原講，同區藍澄灣2座高層海景單位近日以433萬元賣出，創同類新高，建築/實用呎價6,787/9,601元；而盈翠半島兩日已有2宗成交，建築呎價都升穿9,000元。

除咗受居屋效應帶動嘅區域，有代理爆料，荃灣綠楊新邨D座高層單位啱啱賣咗500萬元，建築/實用呎價7,452/8,591元，打破成個屋苑樓價紀錄，而西灣河鯉景灣安屏閣中層D室賣673萬元，建築呎價10,212元，創同類新高。

踏入二○一三年，部分藍籌屋苑交投加快。代理話，鰂魚涌太古城今個月已錄到7宗買賣，其中春櫻閣低層H室同美菊閣低層G室，分別賣咗1,300萬同1,148萬元，後者建築呎價只係9,410元。香港置業常曉光話，上車需求帶動，九龍灣淘大花園今個月暫時已有6宗成交。