魚缸Blogger：重慶鋼鐵 發力衝刺

今年嘅最尾一日，唔單止港股要作最後衝刺，重慶鋼鐵（01053）亦唔執輸，出招將成績表變靚啲，上周五股價爆上，以接近全日高位1.47元收市，升幅6.5%，值得大家關注吓。

雖然重鋼今年首三季勁蝕11億元人仔，但本月先後獲得重慶市政府合共20億元人仔嘅財政補貼，補償公司喺環保搬遷過程所產生的經營成本。另外，公司仲喺月中以4.3億元人仔賣咗貨物裝卸業務，集中火力發展主業，淨係計呢兩筆，話唔定會令佢實現全年盈利。公司資產重組方案亦已獲批，母公司重鋼集團啱啱注資169億元人仔，目標係鋼鐵產能可由每年300萬噸擴至600萬噸。睇番幅圖，上周股價踩油收復10日線1.36元，短線如果仲守得住嘅話，唔大貪先睇五十二周高位1.57元。

重慶鋼鐵（01053）

阻力位：1.57元

支持位：1.36元