Fundman睇市：國美炒落後諗得過

美國共和民主兩黨，繼去年「國債上限」幾乎玩出火之後，今次又藉「財政懸崖」死線，各懷鬼胎爭取政治籌碼，周末外電所見，兩黨談判持續嘗試收窄分歧，但開富人稅部分仲係大纜扯唔埋，最後隨時擦槍走火。

在不明朗因素籠罩下，上周五標普恐慌指數（VIX）抽升17%至22.72的近五個月高位，道指挫158點，最後報12,938點，一口氣跌穿50日及200日的中期趨勢線，亦同時令三月至今，13,338、13,661及13,365點的大型頭肩頂，十畫之間多咗七八撇，大有危機逼近的味道，瑪雅末日先啱啱大步跨過，還望美國千祈唔好搞出個大頭佛，踏入一三年就引爆金融核彈頭。

外圍不穩A股受惠

上星期五，濃厚節日氣氛瀰漫的港股，主板成交跌至唔到400億元，恒指全日得78點波幅，收報22,666點，升46點，若非上周五美股大插水的話，恐怕今日半日市會更加買賣兩閒。

上周五滬綜指氣氛唔錯，再升27點報2,233點，見無故事好炒，一眾A股ETF相當搶眼，華夏滬深三百（03188）升1.2%報31.45元，創推出後新高；安碩A50（02823）人氣更盛，近18億元成交額拋離第二位的工行（01398）。短期歐美金融市場不穩，隨時益咗A股，令更多資金流入去博反彈。

國美電器（00493）上星期向分析員透露，一線城市完成布局，準備一三至一五年間，重點開拓二、三線市場，以提高佔有率，單是明年就計劃在二級市場開200間新店，如果同今年上半年的17間淨增長分店作比較，看來一年重整低效益分店的工作完成後，管理層又再進取開店。

於今年首三季，國美同店銷售跌幅由34.4%及18.7%收窄到16.3%，銷售額倒退幅度亦由28.6%、17.1%收窄到8.8%，最壞時刻已過去，唔少大行都估計今年開始輕身上路，業務會恢復動力，實際增加開店外，電子商務平台估計也由投資期，到最遲一四年進入收支平衡，存在復甦的大賣點。

綜合預測，國美電器由今年蝕3.89億元人民幣，到明年由紅變黑賺4.64億元人民幣，現價市帳率0.66倍，卻只及歷史中位數3.4倍大約五分之一，如果要搵大落後的股份，國美絕對值得投資者考慮。