股海實戰：中信泰富 爆發力強

眨眼又一年，屈指一算，恒指今年以來已升四千多點或兩成，但無論機構投資者抑或散戶投資者，相信唔少投資組合都跑輸大市，慶幸末季A股帶動港股快速回升，短炒一轉幫補吓。

上周五券商股係威係勢，阿莊當日推介嘅光控（00165）真係相當靚仔，見佢一開市經已高見13.1元，遂以平均價13.18元追入兩萬股，本來諗住即日鮮，點知見尾市掃得狂野，踢穿三月中旬高位14.02元未有回頭，故決定多坐一會，結果當日高位見14.48元，收報14.44元，升11%，今日會睇位食胡。

光伏股炒作未完

不過，光伏股就出現回吐，事緣一深圳A股光伏企業停牌，傳聞老闆着草，但其實消息已流傳多日，偏偏大戶趁市況淡靜用來震倉，但見到幾隻光伏股都唔多跌得落，尾市跌幅收窄，相信光伏股炒作國策概念仲未完結，會繼續持有興業太陽能（00750）。

呢次大量熱錢押注中國經濟復甦，內險、內房、內銀、內需、基建等各個中資股板塊都相繼起動，但見原材料股仍浮浮沉沉，表現相對落後，皆因末季正值淡季，且庫存消化進度尚不明朗。但阿莊相信，只要內地經濟復甦嘅大方向冇變，明年首季原材料股點都會來一次發力狂追，將部分獲利資金低吸相關股份嘅策略可取。

上周五見到中信泰富（00267）亦開始發力，高位見11.36元，收報11.28元，升4.25%，成交1.86億元。該股主要從事鐵礦開採、特鋼及房地產業務，喺預期明年內地致力推動各項大型基建項目之下，有助改善鐵礦石需求，早前澳洲資源與能源經濟區將明年鐵礦石價格預測調高了5%，最近鐵礦砂更創出近兩年嘅最大升勢，全球最大嘅鐵礦砂出口商淡水河谷十一月下旬以來股價已累升近兩成。

中信泰富旗下中澳鐵礦首條生產線已於上月開始生產精礦粉，料明年會陸續試產投產。此外，近兩個月整個內房股板塊累積一定升幅，可見旗下各項主營業務基本因素有改善，但股價尚未充分反映。走勢上，250日線現處於11.77元，12元又係下半年嘅主要阻力位，短期若能以大成交突破12元關，爆發力不容低估，支持位喺10.5元。