樓市出更：西貢限量地估值天與地

西貢沙角尾限量地同沙田九肚第56A區B1地盤豪宅地喺今個禮拜五截標，雖然西貢沙角尾有限量條款，但有測量師認為項目鄰近西貢市中心，配套唔係太差，估計每方呎樓面地價最高約9,000元。有市場人士認為雙辣招對沙田九肚地影響較大，估計樓面呎價約9,000元至1萬元，料兩地皮可以為庫房帶來最多約36.62億元收益。

劉Sir知道，上述西貢沙角尾限量地不單止係今年西貢推出嘅首幅地皮，亦係區內第一幅設有限量條款嘅住宅地，投得財團須興建不少於240個住宅單位，不過計番平均每個單位面積仍然可以超過1,000方呎。

高緯環球大中華區評值諮詢部董事張翹楚同劉Sir講，其實西貢沙角尾配套唔係咁差，位置上鄰近西貢市中心，再加上西貢喺外地人眼中，一向係新界區當中較高級嘅地方，佢估計地皮每方呎樓面地價約9,000元，估值約22.42億元，為市場上限價。

至於對上一幅賣出嘅西貢住宅地，已經係舊年十月賣出嘅西貢甲邊朗低密度豪宅地，當時成交樓面呎價約14,741元；但要知道，今次截標嘅地皮高限為8層高，並設有限量條款，唔可以當純洋房發展項目咁睇，所以市場對地皮估值差距都幾大，有個別測量師老友估計樓面呎價低至約4,000元，係市場估值下限。

九肚地料值14.2億

另外，唔少業界都覺得買家印花稅（BSD）對沙田九肚豪宅地影響會較大，張翹楚話，沙田九肚唔係核心豪宅區，唔似九龍站屋苑咁有強勁承接力，物業轉手比較困難，再加上該區未來供應較充裕，估計樓面呎價約9,500元，估值約13.53億元，市場估值則介乎約12.8億至14.2億元。

過去一年多，沙田九肚賣出多幅地皮，其中今年五月賣出嘅B5地盤樓面呎價10,551元，係區內最貴嘅一幅，而喺八月底再賣出嘅同區B3及4地盤樓面呎價約9,551元。