股海實戰：光大控股 隨時發力

聖誕假後復市，受惠假期期間A股做好，港股高開後曾高見22,718點，收報22,619點，升78點，但成交僅417億元，皆因唔少缸邊友仍在度假中，相信要等下周三長假完畢始見真章！

每年首季都係上市公司高峰期，唔少公司開始埋數，發現盈收數字有大出入就要公告投資者，好似隻熔盛（01101）最近便發出盈警，尋日股價曾低見1.23元，收報1.25元，跌7%。印象中呢隻股真係好難玩，加上股價累跌幅度甚大，層層蟹貨，一三年行業復甦前景又未明朗，故結論係「避之則吉」。

鉑陽可候調整翻兜

家電股海信科龍（00921）同威靈（00382）最靚仔，同升逾9%，創維（00751）表現最差，逆市低收，短線4元未宜有失，否則須提防引發較大沽壓。新能源股方面，保利協鑫（03800）仍在整固，會繼續留意1.5元水平承接，反觀早前阿莊同樣有提及過嘅細價股鉑陽（00566）就有鑊氣，股價急升16%，但上到呢啲位點都要抖一抖，有貨喺手可考慮先行獲利，候調整再睇位翻兜。

呢期A股走勢似係大漲小回，A股ETF大旺，基金加注中資金融股。尋日傳來光控（00165）母公司光大集團嘅重組方案已獲有關部門批准，將改制為股份制公司，據講完成後將理順內部股權關係，精簡架構。提到光大集團，阿莊都認為來一次大規模重組實有其必要，事關齋睇有關分拆光銀來港上市一事，講咗咁耐都搞唔成，聽八卦友講，幾家大行早前力勸班老總接受現實，把握時機以市價分拆光銀，點知都係忠言逆耳，結果拖到今日都冇結果。也許由國有獨資改為股份制公司，有利集團日後引入策略股東或實現整體上市，加快改善決策及提升營運效益。

講番旗下光控，公司剛獲授合共1.5億美元信貸額度，將用於撥付正常企業營運資金需求，適逢兩地金融產品市場需求大增，料有助加快業務發展。此外，近期A股氣氛好，其股價亦受惠，本月中旬連現兩支大陽燭，上周調整穩守10日線，短線若能以大成交突破中旬高位13.02元，下一個阻力位睇三月中旬高位14.02元。