樓市出更：新居屋王聖誕降生

這個冬天不太冷，樓市熱風再席捲居屋及公屋單位。雙辣招失效下，居屋樓王鰂魚涌康山花園再有單位創新高，該屋苑一個低層單位喺Boxing Day以每呎9,693元賣出，成為全城最貴呎價居屋，同私樓已無分別，萬元一呎指日可待；同時，馬鞍山公屋耀安邨有大單位亦以278萬元賣咗，成為區內公屋樓王。

美聯施遠洋同劉Sir講，呢個居屋樓王單位，係康山花園7座低層A室，建築面積約521方呎，實用面積約431方呎。原業主前年入貨價306萬元，之後自用，可能見近排個價好，叫價520萬元放盤，喺Boxing Day嗰晚，白表賣咗505萬元，呎價約9,693元，實用面積呎價則約1.17萬元，創下全香港有史以來居屋呎價新高，較上個月紀錄再高近7%。

耀安邨售價全港第四

施遠洋仲同劉Sir講，其實同區私樓都要過萬元一呎，康山花園雖然係居屋，但有會所又近港鐵站，樓價仲有得升，依家批康山業主叫價，每個呎價都要過萬元。

除居屋外，有代理爆料，馬鞍山公屋耀安邨耀欣樓高層單位，面積707方呎，日前白表賣278萬元，雖然減咗7萬元成交，但呢個價相信係全區最貴公屋，更係全港第四高紀錄，呎價成3,932元；另外，同屋邨耀榮樓有個兩房單位，今個月初白表都賣成210萬元。

馬鞍山公屋除有「癲價」，仲有「癲租」，恒安邨恒海樓有個面積570方呎公屋單位，月租達9,800元，真係拍得住私樓。

而世紀21奇豐梁榮貴都話，成個市場無晒盤，全個馬鞍山要搵三百萬以下放盤，都淨係得幾個居屋盤。市場消息又話，同區觀瀾雅軒6座高層A室，成交價達1,260萬元，呎價高到9,026元，創全屋苑標準單位呎價新高。

港灣呎價9127又新高

其實除咗馬鞍山，其他屋苑樓價都創新高，香港置業稱，大角咀港灣豪庭6座極高層E室，賣咗460萬元，呎價約9,127元，係今個月第二次創全屋苑新高。中原都話，元朗錦綉花園E段3街單號屋賣710萬元，呎價8,353元，創同類新高；西灣河鯉景灣怡海閣高層G室，有少少海景，賣咗860萬元，呎價約11,421元，創同類新高。