股海實戰：中糧具追落後空間

美國財政懸崖談判爭持不下，美股上周五低收作結。港股上周五已先跌逾百點，今日平安夜僅半日市，唔排除炒家持貨過長假嘅意欲受外圍市況影響，恒指短線若未能企穩22,500點以上，下一個較大嘅支持位要睇50日線21,818點。

上周四日本央行議息後決定擴大量寬規模，阿莊喺度諗，嚟緊日本好可能進入新一個「放水」年代，咁搞法只會令通脹變得更加厲害。本來正路睇今年美國聯儲局可能退市，低息環境一旦逆轉，將打散全球魚缸，但如今睇嚟，至少喺明年上半年出現呢個情況嘅可能性唔大，反觀熱錢不斷流入，資產炒風繼續旺盛，通脹加劇，故奉勸有樓人士，投資物業賺錢沽貨幾時都唔會錯，但自住嘅物業就千祈咪沽﹗

興能獲大盤吸納

上周四阿莊買入嘅興業太陽能（00750）踢穿咗7元關，收報7.04元，逆市升4.76%，成交5,364萬元。睇盤路似乎真係有大盤力吸，點解睇得咁好，等公司公布業績便自有分曉。反觀隻保利協鑫（03800）上唔到1.7元樓上，上周五遂以均價1.64元沽出12萬股，再睇位翻兜。

按每股3.39元進行十供三，集資41億元嘅中糧控股（00606），剛公布供股結果，超購逾六倍！是次集資所得擬用作贖回CB，中糧喺一○年發行呢批CB，一五年到期，用作支持擴產所需，每年支付CB利息達1億元，但由於換股價每股11元，暫時睇唔到持有人有換股動機，而截至今年六月底止公司淨負債比率達到124%，故是次供股集資贖回CB嘅安排可以理解。

今年上半年大豆壓榨行業競爭激烈，加上內地產品市場走勢弱於海外，油籽加工業務毛利率顯著下降，而大米出口量萎縮，內銷又處於發展階段，致使中糧中期盈利倒退。不過，近年公司積極擴產，構建由田間到餐館覆蓋整個食品產業嘅完善產業鏈，加上股東背景，未來喺內地食品安全領域將擔當領導性角色，相信捱過今年嘅低潮後，明年有望重拾正軌。

供股股份將於本周四上板，若然要偷步沽貨，上周五應已見沽壓，但當日股價卻逆市升0.6%收市。相信周內供股出籠後，即使有沽壓都只係有限同短暫性。事實上，十一月以來其股價受供股相關因素影響，表現明顯落後大市，且看不明朗因素消除後會否出現「補漲」行情，向上以大成交踢穿4.7元有景，初步支持喺10日線4.29元。