樓市出更：旺角靚舖求客有價講

旺角西洋菜南街有吉舖丟空近一年，反映商戶對後市摸唔清，其中以賣小食出晒名嘅旺角登打士街一段，近排罕有咁有四個空置多月地舖招租仍無人吼；另該段街有個舖位已畀頭飾用品店以原租金租咗，反映業主求客唔求租，最緊要快啲租出舖位。

西洋菜南街地舖租賃情況可作為該區寒暑表，其中位於登打士街近花園街一段嘅單號地舖，舖位數目大約20多間，租戶多以售賣魚蛋、烤肉、串燒及特色飲品為主，佔該段街商舖數目一半。

四個地舖罕有齊丟空

由於來貨等成本上升，加上同區附近售賣相類型食品嘅店舖多，該段街舖部分食肆已「投降」遷出。有代理同劉Sir講，依家該段街有四個交吉多月嘅地舖，情況為近年少有。

個代理話，其中一個鄰近通菜街嘅地舖，面積約300方呎，呎租約400元，原本由經營歐式小食的商戶租用，月租近12萬元，不過，幾個月前個租戶同業主傾掂數，提早終止租約，業主依家維持原先月租招租都未能租出，相信若有商戶具誠意洽租，業主會考慮減租。

麵店變賣頭飾無加租

同街兩個分別原由日式食店及時裝店租用嘅舖位，交吉多個月，面積各約600多方呎，月租分別約8萬及12萬元，業主依家將該兩個地舖同地庫一齊招租，意向月租30萬元。

由於該登打士街一段食肆競爭大，部分食店租戶計過數後，終選擇遷出，有代理話，原由麵店租用的該段街舖一個地舖，月前畀頭飾用品店以原租金承租，月租約18萬元，呎租約300多元，足見業主求客心切。

登打士街地舖鄰近西洋菜街，惟呎租只介乎約300至400元，其實唔算貴，但競爭激烈，個別留守的租戶都各出奇謀賺錢交租。而在登打士街賣串燒嘅林先生話，「登打士街及附近街道唔少租戶好多都係賣小食，生意點夠分，商戶要出奇制勝，如果唔係好易被淘汰。」另有位張小姐認同生意難做，所以行過都花幾十元幫襯支持。