股海實戰：上海實業不妨冷敲

熱錢湧港，唔少上市公司把握機會喺魚缸抽水，但見下周長假將至，本周首兩個交易日大市每日成交額仍企喺600億元樓上（尋日成交額1,184億元，其中有配股上板嘅友邦（01299）成交額565億元），都算頂得吓！唔信後市會繼續升，最多唔做嘢，別心急開淡倉！

面對近期內房炒風再現，國土部尋日開腔，強調會繼續堅持房地產調控政策，並保持從嚴從緊嘅基調。尋日內房股腳軟，最叻係隻人和（01387）同融創（01918），分別逆市升12及4%。不過，又唔使因為咁太過擔心，畢竟內地市場流動性已較去年上半年大有改善，且中央如今只係重申政策未變，而未有再推新措施，故內房股股價短期係有調整，但暫未有大跌之虞！

尋日隻雨潤（01068）係威係勢，抽到上5.9元，阿莊順利以均價5.88元沽出食胡。此外，按計劃沽出國泰君安（01788），但見隻保利協鑫（03800）跌穿1.5元，所以拖慢手腳，睇睇上唔上得番1.5元樓上再落場。

上海實業（00363）股價自十月中旬以來一直受制於26元水平，尋日突圍而上，高位見26.45元，乃今年三月中旬以來高位，收報26.4元，升2.9%，成交增至6,542萬元。

未來重點發展水務

最近上實高層接受內地傳媒訪問，大談業務發展，當中提及未來會繼續做大水務業務，並尋求喺明年底安排在香港作第二上市。事實上，上實嘅業務遍及基建（包括公路及水務）、房地產及消費品業務，每項業務都具備分拆獨立上市嘅條件，截至六月底止手頭有現金及等值逾百億元，有條件進行資產重組或收購合併。

同屬大紅籌，北控（00392）現價市帳率1.5倍，上實則為0.95倍，估值落後反映公司作風較保守，且今年公司盈利受到內房調控嘅不利因素影響。不過，近兩個月整個內房板塊估值有所改善，而上實現價一二年預測市盈率才8倍多，吸引炒家起哄唔出奇，睇實成交小注跟炒，向上下一阻力區喺28至30元，50日線支持喺25.2元。