樓市出更：資金圍「賭」細額貨

資金瘋狂搶爆工商物業，曾拍賣的薄扶林貝沙灣6個電單車位，昨再度原價拍賣，獲搶高近三成以28萬元沽，為近年罕見二手電單車位成交，另長沙灣宇晴軒連約車位亦以100萬元賣出，搶高22%。尖沙咀振華商業大廈低層「迷你」單位亦搶至呎價過萬元創新高價售出。

工商舖熱爆，環亞拍賣尋日推出多項呢類物業，劉Sir當然有去捧場，原價22萬翻拍嘅貝沙灣6個電單車位，更搶至28萬元賣出，依家只有一個車位租出，月租約400元，估計全數租出回報率可達10厘。

另外，尋日宇晴軒一個單號車位亦連約以100萬元賣出，獲搶高達22%，現時月租金約2,300元。該盤本月底另有10個電單車位推拍，一併開價32萬元，同日亦有馬鞍山翠擁華庭同九龍塘星輝豪庭電單車位翻拍，其中翠擁華庭41車位減價至218萬元。

禮頓山車位賣263萬

車位做價係咁升，尤其豪宅車位依家動輒要200萬元以上，好似向來一年只得一、兩宗純車位成交的跑馬地禮頓山，最近有個1樓車位以263萬元賣出，創咗個項目新高指標，個車位○七年時成交價只係60萬元，未夠六年已經升值近3.4倍，升值潛力仲好過同屋苑嘅豪宅單位。

振華三客爭 升值73%

另外，振華商業大廈低層B室，面積只有160方呎，在拍賣場亦獲3組客爭至182萬元拍賣沽，呎價高達1.14萬元，唔止搶高兩成，仲比原業主八月時105萬元買入價，高出73%，呎價創新高。

而早前錄新高呎價成交嘅同區首邦行，一伙低層千呎戶獲承價至775萬元被收回。銀主盤觀塘中懋工業大廈中層B4室，以516萬元喺另一拍賣場沽，呎價約4,282元。

至於具收購概念嘅西營盤兩個半契住宅銀主盤，獲投資者熱搶，終由一黃姓投資者購入；其中第一街雙號中層戶，錄50口承價，成交價200萬元，搶高1.5倍；另一伙梅芳大廈高層D室售112萬元，高開價56%。