Fundman睇市：蒙牛有睇頭

港股一連六日逐小改寫今年指數新高，昨日由內銀股帶動，恒指升179點，年內首次收於20,500點關口樓上，好友揀聯儲局議息前攻堅，博尋晚聯儲局主席伯南克會有其他量寬措施，以取代一月一日就唔存在的扭曲操作（OT）。

中國公布十一月出口數據，增長放緩至2.9%，及不上市場預期9%的三分之一外，也令九、十月份9.9及11.6%的強勁出口增長，顯得迴光反照味道變濃。數據公布後，過去一季時間不斷升值的人民幣，強勢有逆轉迹象，看來為了扶持出口，匯價難免要犧牲一下。

尋日上海市計生委發布會，高調公布將引導更多家庭按政策生育第二胎，同時將第二胎生育要分隔四年的規定也一併取消，是意味一孩政策已經完成歷史任務？抑或只係上海一孩政策靜雞雞取消咗，未來幾日值得留意發展。而一眾兒童護理產品及奶粉股，如青蛙王子（01259）、雅士利（01230）、合生元（01112）同蒙牛（02319），都可能是政策改動的即時受惠者。

另外還有一則關於蒙牛的消息，中糧集團入主後，希望洗刷過往乳產品偶有出事之負面形象，短期會相約投行與芬佬上去睇廠及牧場，解釋奶源自給自足計劃的進度，且看一三年復甦的故事，可唔可以打動到大孖沙重新睇好。

中糧有條件繼續升

講開中糧系，主攻油籽加工的中糧控股（00606），昨日供股權（02957）最後交易，收0.87元，連同每股要供3.39元，同正股4.28元相當貼水，基金買rights嚟供，興趣睇落都幾大。

早前美國乾旱牽動全球大豆價格急漲，曾經令人憂慮下半年油籽加工毛利率可能繼續受壓，不過睇番上半年中糧庫存較去年同期增加近兩成，去到228億元，當中大豆合約佔超過五分之一，假如大豆價升令食用油及豆粕等主要產品價格齊齊水漲船高，中糧有可能反而受惠，近日內地通脹數據已見底位反彈迹象，相信中糧毛利率受壓的最壞情況，經已在上半年完結。

上半年，受毛利率大幅收窄，去到6.3%的影響，中糧純利大跌68.7%，至5.02億元。按市場估計全年賺14.35億，意味下半年要賺9.33億，以下半年近600億的營業額，假設毛利率回到約6.9至7%，達標未嘗不可，供股後輕身上路，一三年預期市盈率低於9倍，估值合理，短期有條件繼續做好。