股海實戰:保利協鑫炒家埋位

港股喺熱錢充斥之下繼續上升,執筆時又聽到金管局注資,難怪市況大漲小回。前日本欄提及可留意嘅體育用品股板塊果然起動,安踏(02020)及匹克(01968)尋日分別升7%及6%,而前日按計劃買入嘅李寧(02331)亦升7%,收報4.89元,再出多支陽燭短炒可睇位食胡。

尋日已按計劃沽出東風(00489)及上實城開(00563)食胡,另短期擬再增持滬杭甬(00576)2萬股。見霸王(01338)都升得起,正加緊留意落後股,食品股有雨潤食品(01068)及中國食品(00506)、重機股有三一國際(00631)、旅遊股有香港中旅(00308),醫藥股有中國製藥(01093),今日擬睇位買入雨潤2萬股及中旅10萬股。

當指數同一線股經已累積一定升幅後,獲利資金開始放膽追求更大回報,少理基本因素,咁嘅情況又輪到光伏股出場。尋日龍頭股保利協鑫(03800)以全日高位1.49元收市,升幅11%,成交額7.53億元、興業太陽能(00750)及陽光能源(00757)升逾8%、卡姆丹克(00712)升11%、鉑陽(00566)升7.6%,板塊人氣突然高漲!

據悉目前內地有約九成多晶硅企業處於停產狀態,加埋海外市場不濟,行業陷入困境,迫使上大人出手打救,在行業十二五規劃中調整有關光伏發電嘅總體裝機容量目標,並就發電提供補貼。尋日光伏股一擁而上,便是源於有消息指財政部擬撥付70億元人仔支持啟動光伏發電,計及年初撥付嘅60億人仔,總共已撥付130億人仔。

在眾多光伏股中,保利協鑫交投較活躍,雖然晒士唔細,但每次股價起步都行得幾快,啱晒炒家胃口,尋日才現首支大陽燭,照計至少仲有三幾日炒下,踢穿上月高位1.61元,下站阻力喺250日線1.79元,50日線支持喺1.33元。

鉑陽亦具留意價值

若然想搵細價啲嘅,可以留意鉑陽,該股自上月上旬升穿250日線後,喺0.25至0.29元上落逾月,尋日以陽燭收市,成交增加。公司已通過易名為「漢陽太陽能」,本月下旬將會召開股東特別大會審議漢能行使認購權等議案,順利通過嘅話公司既可集資逾10億元,而漢能嘅持股量將增至五成,未來將有望更好地發揮鉑陽呢個融資平台。

阿莊

市傳中央將出手打救光伏業,保利協鑫作為業內龍頭,自然可以受惠。(資料圖片)