樓市出更：樓下管理員租售心水清

地產代理公司擁有強大嘅資料庫，所以有人話代理係最了解市場。劉Sir覺得，其實最貼市嘅應該係你樓下個管理員，事關佢日日睇住啲住客出入物業，應該最清楚幢樓嘅情況。不過，管理員了解住客資料唔係問題，但如果佢有意收集資料，甚至轉介畀地產代理，就屬無牌從事代理工作，有可能觸犯刑事同防止賄賂條例。

地產代理監管局行政總裁伍華強剛上任兩個幾月，尋日約咗劉Sir講吓最新工作報告，佢話局方正調查緊一宗來自紅磡區嘅投訴個案，話有間具規模嘅物業管理公司指示旗下管理員，留意住戶搬出搬入等情況，收集買賣、租賃同放租資料，並轉介畀代理收取轉介費。

佢話，根據「地產代理條例」對地產代理嘅工作定義，從事有關轉介工作嘅人士及公司必須領有牌照，一旦該公司管理員涉無牌從事代理工作，屬於刑事罪行；而持牌人如果提供任何利益作轉介費，可能觸犯防止賄賂條例，一旦查證會將案件轉交畀警方同廉署。

地監發信防「無牌代理」

地監局近年亦錄到牽涉無牌代理嘅投訴同檢控，而罰則最重嘅兩宗個案，係判監六星期、緩刑兩年同埋罰款1萬元。伍氏話，當局一向好關注「無牌代理」，擔心其他物管公司倣效，所以去信超過90間物業管理公司、物業管理公司聯會、同埋持牌代理，提醒佢哋唔好以身試法，又將信函上載網頁供各方參考。

對於近期市況淡靜，因而引發有關事件嘅講法，佢話，投訴喺幾個月前收到，相信未必同市況有關，但認為事件影響性大，有必要防範於未然。但如果物業管理公司同管理員領有牌照，就完全合法。

被問到新上任嘅感受，佢話覺得地監局工作繁忙，正着手兩項事項，包括明年起生效嘅二手住宅實施實用面積安排，該局過去幾個月已同逾5,000間地產代理聯絡；並落區巡視逾350次同打咗逾1,800個電話，了解代理嘅準備工作同疑問。

實積資料明年免費查

另一項就係明年四月下旬，一手樓以實用面積計算嘅條例生效，佢哋正籌備一份業界指引，並會適時發放。差餉物業估價署尋日話，預計明年四月會向私人住宅物業（唔包括村屋）差餉繳納人免費提供持有物業嘅實用面積資料。