股海實戰：港鐵攻守兼備佳選

今日係百年一遇嘅「一二年十二月十二日」，金融圈亦度過不平凡嘅一年。全世界經濟都喺度「鬥差」，偏偏各地魚缸逆行而上，臨年尾熱錢不斷湧港，單係尋日就有過百億銀，但奇怪係眼見今年贏到大錢嘅股友唔算多。

再睇近期開始炒A股見底同經濟復甦，內房股股價排隊創一年新高，但內地卻隨處可見大量新建住宅空置。內地廠家話今年蝕到叫救命，但內銀嘅理財計劃卻可以變相為存戶提供五、六厘保證年息回報，喺新增貸款表現遜色下，如何長期支付高息，實乃疑問。

總而言之，呢次升市叫人跟得唔安心，但唔跟就更難過日子，連阿莊一位做經濟學家嘅友人都話要趁有熱錢來港跳落股海搵食，趕喺大難來臨前搵得一餐得一餐，各位惟有自求多福！

本地建築股宜小敲

講番組合持股，上實城開（00563）及東風（00489）分別升4.7%及2.8%，周內會睇位食胡，尋日按計劃買入李寧（02331）。嚟緊幾年香港大興土木，建築業可受惠，惜建築股交投唔多，只能買少少貨坐定定，博佢發市當三年。好似過去一個月萬順昌（01001）開車，話咁快股價已翻一番。想搵冷門股，可以睇吓新昌營造（00404）、俊和（00711）同有利集團（00406）。

揸住領匯（00823）嘅股民真幸福，今年以來單位價格已累升逾五成，仲未計有三厘幾息。其實，領匯可以炒到咁，相比之下，港鐵（00066）算係落後。

話晒港鐵都係半個大地主，又有物業收租，加上本地鐵路業務現金流高、鐵路網絡不斷擴充（未來十年將完成五個新嘅策略性鐵路項目，包括西港島線、廣深港高鐵香港段、沙中線、觀塘線延線，以及南港島線東段），近年更積極外闖，參與內地鐵路相關項目建設及營運，發展前景樂觀，盈利前景具能見度。

今年以來，港鐵股價累升兩成多，比人落後主要係反映來自物業發展利潤嘅收益減少，以及嚟緊會因應社會訴求更改票價機制，但相信大前提港鐵唔會做蝕本生意，只係賺少啲啲。券商普遍預期，明年港鐵盈利可重拾升軌，現價一三年預測市盈率16倍，攻守兼備。七月以來每次股價回落至50日線（現處29.9元）都係上車時機，按預測市盈率20倍計，中期目標可定喺38元，上半年嘅阻力位28元如今已變成重要支持位。