樓市出更：點心店慳租排隊入商場

街舖大幅加租，商戶為免捱貴租，都紛紛搬到商場，米芝蓮食肆添好運點心專門店，喺旺角廣華街嘅總店，明年會搬到信置（00083）旗下嘅奧運站奧海城商場，點心店老闆兼主廚麥桂培同劉Sir講，搬入商場之後，預期新店租金佔營業額會減少至低於一成，若果其他租用街舖加租唔合理，唔排除會繼續進駐商場。

位於廣華街嘅添好運總店，早前開業唔夠一年已成為米芝蓮一星食肆，門外經常大排長龍，無奈業主大幅加租，麥桂培同劉Sir講，加幅仲以倍數計，搞到租金佔營業額比重超過15%，完全計唔掂數，而且原先總店面積只係有約莫800方呎，僅29個位，流轉速度慢，一直想搵個較大嘅地方。

佢話，奧海城商場主動同佢哋接洽，所以一拍即合，租咗二期佔地約2,300方呎嘅地舖成為新總店，一簽五年約，計劃趕及明年農曆新年開業。

添好運冀營業額倍增

佢仲話，店舖大咗近兩倍，可以容納100個客人，商場人流亦有保證，無論喺成本同管理上都可以有更好控制，估計投資額200萬元以上，希望營業額增一倍，可以一年內回本，預計新店租金佔營業額會降至低於10%。

添好運依家仲有中環香港站、北角和富道同深水埗福榮街3間分店，當中以福榮街最大，兩層面積達1萬方呎，不過佢話仲有一年多租約，尚未傾續租，但覺得樓面太大，營運上較難控制，若然加租情況唔合理，可能會再進駐商場。

奧海城人流料破紀錄

而近年積極提升商戶組合嘅奧海城，引入包括上述添好運等3間食肆，令餐飲佔商場比例增至30%，信和集團租務部總經理陳欽玲話，星級食肆大大擴闊客源，預期今年全年商場人流同營業額均創歷年新高，按年上升25%及17%，全年營業額料達18億元。她續稱，明年有約28萬方呎樓面租約期滿，料續租率逾50%，租金升幅將會有雙位數字。

另下周初有最少3個銀主盤透過拍賣場推出，包括西營盤梅芳大廈高層單位，以及同區第一街雙號中層舊樓，同屬半契盤，開價分別為72萬及80萬元。