股海實戰：農行有水位炒一轉

熱錢繼續湧港，恒指再創五十二周新高22,377點，但其實呢個月以來，恒指升咗80點都唔夠，若然純睇指數表現，根本感受唔到個股炒到有幾狂野，尤其係內房股。阿莊相信，本周係長假前本輪升浪最熱鬧嘅一周，炒家會傾盡全力賺聖誕禮物，只要本周指數繼續高企，個股炒風將見是浪頂峰！

體育用品股見異動

剛過去嘅周末，阿莊去咗粵北一趟會友，期間專門去行吓當地嘅步行街，發覺近兩年見到各大體育用品品牌爭相開分店嘅情況有明顯改善，僅安踏（02020）仲有多過一家分店（總數亦只係兩間）、361度（01361）有一間，李寧（02331）更加係搵唔到有分店，與過去同一條步行街一個體育用品品牌閒閒哋有三至四家分店嘅情況大有不同。

經歷了零售網絡盲目擴張，到如今大肆收縮，體育用品股股價亦已回歸基本步。呢幾個月大市顯著回升，體育用品股未見動靜，直到上周五始見安踏似似哋樣，尋日輪到李寧異動。當炒風到尾段，通常會輪到呢類弱勢板塊發力。論走勢李寧最合眼緣，周內會重點關注，短線回吐守4.4元擬買入50,000股，目標睇5.2元，跌穿4.25元止蝕。順帶一提，尋日按計劃沽出波司登（03998）及昆侖能源（00135），換入滬杭甬（00576），目標價睇6.8元，止蝕位定喺5.75元。

城鎮化概念繼續熱炒，上周提及嘅南車時代（03898），尋日一度飆到上27.4元，有跟坐順風車夠水位食胡。尋日見話可觀察回吐承接嘅濰柴（02338）則如期整固，逆市跌0.76%收市，報32.65元。其實嚴格嚟講，內銀股亦有城鎮化概念，若然後市真係要再上，無道理少內銀嘅一份。尋日見到農行（01288）有異動，最高見過3.53元，收報3.52元，升1.7%，乃今年五月四日以來嘅收市新高。

提到農行，仲好記得舊年八月初隻股喺4.3元見頂後，備受「空軍」糟質，同年十月低見2.28元。故穩陣起見，先翻查沽空資料，呢排未見異樣。再睇走勢，各項技術指標向好。反正現價距離阻力位4元尚有一段距離，短線尚有操作空間，交投配合可落場短炒，支持位可參考10日線3.4元。