樓市出更：戲院拆售博賺3倍

近年戲院走向集團化，唔少舊式經營嘅戲院除咗改頭換面外，部分索性拆散做商場等其他用途，而一向經營護老服務嘅劍橋護老院創辦人陸艾齡或其他人士，早年購入嘅屯門仁政街7至35號原戲院位置，成個場依家改名叫「多元坊」，搵代理先拆售地下一籃子舖，入場費約520萬元，賣晒可以套現近3億元，比起兩年前成個戲院位等部分購入價，高逾2.7倍。

政府出雙辣招之後，工商物業成交倍增，唔少業主都心郁郁分一杯羹，負責上述銷售嘅中原（工商舖），其商舖部董事黃偉基（Raiky）同劉Sir講，上述仁政街7至35號原本係域多利戲院，由於鄰近瓏門基座商場V City，將來嘅零售氣氛一定暢旺，所以唔少投資者已經喺附近搵舖。

4厘回報 專攬投資者

有見及此，上址業主依家先分間拆售地下嗰30個舖，面積由約84至626方呎，平均呎價超過5萬元，屬市價水平，涉資約520萬至4,360多萬元，有代理話，已經有4個舖獲預留。

Raiky話，為增強市場吸引力，買家成交後首兩年有淨4厘租金回報，佢補充一句，上址樓上1樓等部分可能會改裝後收租。

睇番土地註冊處資料，上址為戲院或有關用途嘅物業，早於二○一○年九月左右以約8,000萬元成交，買家係富欣集團有限公司，而公司註冊處資料指，間公司董事包括陸艾齡及陸艾思。

市區戲院原址可塑性高，所以唔少投資者都好有興趣，有代理話，前身係南華戲院嘅旺角區東京銀座現址，聽講有投資者出價洽購。另利嘉閣邱兆康話，大埔舊墟直街9號地下1至7號舖，依家有6個租客，舖位售價由1,080萬元起。另據土地註冊處資料，中環擺花街52號G01號地舖，以8,100萬元成交。

荔枝角工廈1.7億成交

近年資金狂搶優質工廈，根據土地註冊處資料，荔枝角嘉利工廠大廈樓上一籃子單位，及地下B及C地廠均錄臨時買賣交易，涉資共逾1.75億元，其中後者兩地廠涉資5,000萬元，上址於今年四月分別以1,650萬及756萬元成交，期內樓價飆升逾1倍，上述成交嘅公司董事都係李惠儀。