Fundman睇市：領匯再跌可買

華爾街賓架對財政懸崖傾向樂觀，相信最後有驚無險，前晚道指重返萬三點關口，不過納指卻逆市跌0.8%，純粹因為一隻巨無霸蘋果公司累事，單日插6.4%，報收538.79美元，回顧自九月高位705.07美元回落以來，市值已蒸發四分之一。

人保（01339）今日掛牌，聽聞街外有行為幫阿爺做到好好睇睇，今次孖展相當鬆手，部分甚至將佣金盡歸經紀，務求催谷銷情。尋日睇分配表，認購200萬至7,000萬股的乙組「大飛」，分得幾鬆手吓，一視同仁個個9.03%，意味做大過11倍孖展，今日唔科水就要沽貨，尚幸前日個市同埋內險股齊齊大爆升，尋日聞得人保暗盤有幾巴仙進帳，相信今日唔使揩仲可以賺餐茶，捧場客真係要還神。

急升後的港股呈橫行整固，尋日恒指跌21點，報22,249點，指數無乜睇頭，內房股表現一枝獨秀，早前恒大（03333）出十一月售樓數據，單月銷售額117.9億元（人民幣．下同），十一個月累計達846.3億元，提前達到800億目標，股價已見異動，抽穿4元關。尋日另外兩隻內房照辦煮碗，建業地產（00832）及花樣年（01777）達標消息，也分別刺激股價急升8.8%及6.3%。

二三線內房捧得過

建業十一個月合同銷售93億，已高出全年90億目標3億元，花樣年連同十一月9.79億銷售額，累積71.74億，僅差兩千多萬就到72億目標。搵到份新鮮熱辣報告，目前，內房股股價較資產平均有44.7%折讓，除咗龍頭潤地（01109）、中海（00688）折讓得單位數字之外，其實唔少超過六成折讓的較落後選擇，例如合生（00754）、恒盛（00845）、恒大，以及剛提過的建業及花樣年，在熱錢追捧內房股，並由一線流向至二三線的趨勢下，以上幾隻都有留意必要。

個市人人睇risk on，防守股份難免受罪，在下至愛的領匯（00823）走勢認真麻麻，圖表上出現雙頂之餘，仲兩日內由高位畀人隊低1.7元（港元．下同）。管理層啱啱同分析員見面，透露下半年續租情況，維持上半年勢頭（上半升25.9%），未有受零售市道開始吹淡風影響，尤其是近期車位突然當炒，上半年領匯車位平均月租1,338元，假如私人車位租金跟住車位價升，旗下八萬個車位租金上升潛力都唔講得笑，現價41.2元，一三年息率3.8厘左右，零息環境下，相信再跌水位未必太多。