股海實戰：中國無線蓄勢待發

港股大漲小回，尋日恒指雖然低收21點作結，報22,249點，但阿莊仲好記得，去年八月初恒指正式跌穿去年三月十七日低位22,123點後，四個月唔見近6,000點！依家恒指經已重返去年三月嘅低位，顯示呢個為時年多嘅跌浪終告完結，再睇如今A股確有見底迹象，若然短線恒指能企穩22,000點樓上，有望迎來新升浪。故奉勸各位唔好咁快「畏高」，多多少少都要揸啲貨！

前日經已預告擬更換組合持股，尋日遂以平均價1.95元悉數沽出中國全通（00633），再以平均價1.65元買入上實城開（00563）100,000股。恒指季檢將於今日收市後生效，睇吓指數基金尾市會唔會推高隻新貴昆侖能源（00135）。

天譽置業冷敲之選

最近上大人釋放明確訊息，就係推動城鎮化，農民跑去城鎮，勢必帶動房屋需求。內房股繼續炒作，尋日人和（01387）曾升穿0.5元，成交達2億銀；潤地（01109）再創五十二周高；隻坐咗冷板好耐嘅深圳國際（00152）呢期好似食咗大力菜，尋日以全日高位0.78元收市，升近一成。想搵冷門內房股，其實天譽置業（00059）都好低迷，現價0.64元，今年五月二供一，供股價為0.5元，截至六月底止NAV約1元，旗下貴陽項目第二期預售得款達5.34億元人仔，將於本季交付使用後入帳，料有助顯著改善收益表現，只係平時隻股交投唔多，有待勇者發掘。

電訊設備股呢期算係落後，呢兩日見到隻中興（00763）醒神番啲。再睇隻中國無線（02369），過去三周股價調整一直守住50日線，尋日成功重上10日線，交投增加。受惠將業務重點由以往高端智能手機市場擴展至大眾市場，公司成功抓住3G網絡普及嘅商機，今年上半年收入創新高，達62.18億元，同比翻了一番；純利1.52億元，增長28%。公司正積極為下一代網絡（TD-LTE、FEE-LTE技術）智能終端做好準備，喺電訊營運商增加終端補貼嘅趨勢之下，公司業務有望迎來新高潮。

中國無線股價過去兩個月一直受制於2.5元水平，呢個位正係去年五月下跌裂口位（2.53至2.83元）底部所在，相信整固過後，有力嘗試回補，守穩50日線2.2元可繼續持有。