股海實戰：東風踩油追落後

內地股市回穩，但深滬兩市主板總成交唔到八百億人仔，只可視為短線反彈。港股恒指先高開18點後曾倒跌，收報21,799點，升32點，成交530億元。雖然股份普遍進行整固，指數靠中移（00941）同大笨象（00005）撐場，但到底市況已比想像中強，反映熱錢充斥下，暫時難為股市估頂。

阿莊組合內嘅波司登（03998）尋日逆市下跌，似乎天氣轉冷無助股價表現，短線上唔番50日線2.34元又或者跌穿250日線2.2元，都要睇位逃生。此外，再傳來有上市公司私有化，似乎今年雖然係大淡市，但市場亦不乏大宗購併、私有化。講開又講，金威啤酒（00124）話賣廠講咗成年仲未有結果，上月傳來華創（00291）擬出價半百億元買入金威嘅七家年產共兩千萬噸嘅啤酒廠，但至今尚未得到證實。金威現價2.54元，市值43億元，一般估計出售行動至少可套現30億元。若然作價去到40至50億元，就真係幾唔錯，亦足證現價屬安全水平，博交易唔會再拖好耐，可以喺呢啲位收集，目標上番3元，跌穿2.2元止蝕。

本月內地焦點除咗中央經濟工作會議外，還有醞釀長達八年嘅收入分配改革方案出台。聽講嚟緊實施較大幅度嘅減稅措施呼聲甚高，大方向係透過推動城鎮化，加快內需，支持經濟保持適度增長，估計一三年嘅GDP增長目標介乎7至7.5%。阿莊都多次講過，內地汽車行業養活不少勞工，亦係未來重要出口產業之一，中央必定會全力支持穩定發展，故車股雖然受制於銷量平穩，但亦毋須過於睇淡。

東風（00489）股價末季以來受到中日關係緊張所影響，曾低見8.54元，近月已步出陰霾，重上八月份11元水平，並回補了上月下旬嘅上升裂口位，一旦突破11.48元，可挑戰250日線12.2元，回吐宜守穩10.6元。

達芙妮醞釀突破

至於消費行業，金飾珠寶等奢侈品股受經濟盛衰影響較大，反而衣履等必需品銷情受惠民眾收入上升，只要擴充步伐控制得宜，亦可睇好。當中達芙妮（00210）今年上半年賺4.82億元，公司披露第三季核心品牌業務同店銷售按年增長半成，雖然春夏季清庫促銷拖低了毛利率，但冬季銷售值得憧憬，估計全年盈利可維持平穩。股價上周三起連現三支陽燭，成交回升，本周進行調整，但成交減少，相信整固過後有力再衝高，短線守穩10日線9.6元，可博醞釀旗形突破，目標上試10.5至10.8元區域。