樓市出更：零售龍頭舖分租過冬

旺角一線街舖商戶組合瞬息萬變，例如月前提價嗌億三放賣嘅先達廣場地下一個向通菜街同亞皆老街單邊地舖，當時上址租客係一間賣港式小食嘅舖頭，劉Sir近排見到個舖其中向亞皆老街嘅一邊部分，變咗由找換店用緊，個位由兩個商戶共用，劉Sir相信，零售市道轉靜，一齊分擔風險都好正常嘅。

向來愈夜愈旺嘅旺角區，其中以亞皆老街先達廣場附近最旺，原因係附近有多條通宵小巴線，人流較集中，所以嗰度啲舖位好吃香，就算個舖面積幾細，都好多客搶住租。

講番上述先達廣場地下單邊地舖，地址係亞皆老街83號地下G2至3號，面積只係約234方呎。

亞皆老街舖呎嗌55萬

不過，上述地舖由於向正亞皆老街同通菜街兩邊，無論日與夜，任何時間都好多人經過，真正當眼龍頭舖，所以業主月前將個舖叫價由約1.1億元，調高去到約1.3億元，加幅約18%，呎價55萬多元，高過尖沙咀廣東道地舖成交呎價。

上址月前只有一個租客用晒個舖，係專賣魚蛋同埋果汁等港式小食，月租大約25萬元，為起上嚟，日租要8,300幾元，租金貴唔貴就見仁見智。依家個舖向亞皆老街較為旺嘅一邊變咗由找換店用緊，面積估計大約幾十方呎，劉Sir相信，零售市道轉靜，一齊分擔下都好應該。

廣東道地舖搵客頂租

其實，好多專家都話零售市道前景仍然睇好，但依家就唔係好明朗，所以有啲商戶兩手準備，搵定頂租減磅。聽講尖沙咀廣東道一個地舖等樓面，舊年由連鎖鐘錶店以每月逾300萬元租用，依家委託代理物色商戶頂租，意向月租同依家月租差唔多。另外，中環威靈頓街有個地舖同樓上部分，現由時裝店以每月逾40萬元租用，依家都嗌頂租，新租金面議。