股海實戰：金山軟件挑戰高位

恒指尋日創下五十二周新高22,162後掉頭倒跌，曾低見21,716點，收報21,767點，跌262點，成交539億元。目前恒指50日線喺21,375點，若然只係抖抖氣，守穩其上有望再次衝頂，否則的話可能已見今年高位。

近期經濟數據顯示內地經濟已經企穩，尋日滙豐中國製造業十一月PMI數據利好，但A股照樣下跌。阿莊一再重申，從A股市場信心同成交角度睇，已見到強烈嘅長期入市訊號。

回說組合，手持嘅全通（00633）尋日早段上過2.01元，仲以為又開快車，誰知市況唔就，結果落番1.95元收市，短線若尚未能突破2元關，會考慮先走一轉。此外，近期煤炭股彈唔起，反而啲電力股就有買盤追入，上月中本欄已推介電力股，見潤電（00836）同華電（01071）走勢都對辦，有貨可以多坐一會。

資金流向非主流板塊

今年第三季資金炒電訊相關設備股、金飾及金礦股，末季輪到家電、汽車、燃氣、頁岩氣、內房股等發力，至於其他非主流板塊，總之交得出數據，都唔難吸引資金追落後。近日金山軟件（03888）宣布截至九月底止第三季度業績，純利同比增長44%至1.08億人仔，刺激股價尋日升9%，收報5.24元，主要受網絡遊戲收益增長，旗下《劍網3》通過資料片《洱海驚龍》持續優化，帶動活躍用戶顯著增長。由於新遊戲《月影傳說》和《聖道傳奇》喺第三季後期開始貢獻收入，料良好勢頭可延續。

此外，金山軟件第三季來自應用軟件業務嘅收益同比增長96%，按季亦增長35%，主要受惠金山安全網址導航流量快速增長，以及金山網絡安全產品市場流透率增強，推動相關在線廣告收入創新高，而旗下WPS嘅銷售亦創新高。假設末季盈利表現與第三季度相若，相信全年純利可重現增長，現價一二年度預測市盈率約12倍，計落都仲有重估潛力，難怪尋日下晝三點過後有大盤掃上，唔排除係飛機盤所為。

九月，金山軟件股價成功4元阻力後反覆向上，至尋日見五十二周高位5.29元。鑑於整體業務表現有改善，相信股價喺4.8至5元水平支持力強。只係考慮到尋日升勢頗急，建議待回吐試5至5.1元承接再吼位跟進，中線目標挑戰去年高位5.95元。